sonin.mn
Сэтгэгдэл (22)

Гүрж улстай тогтоосон стратегийн түншлэлээ АНУ зогсоож байгааг Төрийн Департаментын төлөөлөгч Мэттью Миллер бямба гарагт мэдэгдлээ. 


Эрх баригч “Гүржийн мөрөөдөл” нам тус улсын Европын Холбоонд нэгдэх үйл явцыг зогсоох шийдвэр гаргасанд АНУ ба ЕХ харамсаж байгааг мэдэгдэлд дурдаад “тус нам Европтой илүү нягт хэлхээ холбоо тогтоох боломжийг үгүйсгэж, Гүржийг Кремлиэс илүү хамааралтай эмзэг болголоо” гэсэн байна.


Гүржийн ард түмний дийлэнх нь ЕХ-нд нэгдэх үйл явцыг үргэлжлүүлэн дэмжсээр байгаа гэдгийг М.Миллер онцлоод “жагсах, хуран цуглах, үзэл бодлоо илэрхийлэх эрхээ эдлэхийг эрмэлзэж буй гүржчүүдийн эсрэг цагдаа нар хүч хэрэглэсэн явдлыг” буруушаалаа.


ЕвроАтлантын хөгжлийн замд эргэн орж, өнгөрсөн парламентын сонгуулийн үеэр гарсан зөрчлүүдийг ил тодоор шалгаж, хуран цуглах, үзэл бодлоо илэрхийлэх эрх чөлөөг хязгаарлаж буй ардчиллын эсрэг хуулиудыг цуцлахыг Гүржийн засгийн газарт Төрийн Департаментын төлөөлөгч уриалсан байна.


Гүржтэй тогтоосон харилцааг эргэн харна гэдгээ АНУ-ын Төрийн нарийн бичгийн дарга Энтони Блинкен тавдугаар сард мэдэгдэж байсан юм. Үүний шалтгаан нь Гүржийн парламент “гадаадын агент”-ын тухай хуулийг баталсантай холбоотой юм.


Ташрамд дурдахад, Гүржийн ерөнхийлөгч Саломе Зурабишвили хэлэхдээ “хуулийн дагуу сонгогдсон парламент бүрдэх хүртэл албан тушаалдаа үлдэнэ” гэдгээ мэдэгдлээ. Түүний бүрэн эрхийн хугацаа 12 дугаар сард дуусах бөгөөд ерөнхийлөгчийн ээлжит сонгууль 12 дугаар сарын 14-нд болж, 29-ний өдөр ерөнхийлөгчийн тангараг өргөх ёслолыг зохион байгуулна гэдгийг эрх баригч “Гүржийн мөрөөдөл” нам мэдэгдсэн байна. Тус намаас ерөнхийлөгчийн сонгуульд хөлбөмбөгчин байсан Михаил Кавелашвили-гийн нэрийг дэвшүүлжээ. 



Б.Адъяахүү