sonin.mn
Сэтгэгдэл (41)

Зөвлөлт Украинд цэргийн дээд сургуульд суралцан төгсгөж зэвсэгт хүчиндээ зүтгэж явсан олон арван офицерын нэгийн хувьд дайн байлдаан, давшилт хориглолтын талаар энгийн иргэдийг бодвол гадарлана. Тэр мэдлэг туршлагаараа өнөөгийн Орос-Украины энэ дайныг харж, оперативын цагийн байдлыг үнэлдэг. Фронтын мэдээнүүдээс үзвэл Оросын зэвсэгт хүчин стратеги–оперативын нөөцөө бараад, асар их зэвсэг, сум, пуужингийн агуулахуудаа дэлбэлүүлээд яаж ч чадахгүй, дээр нь Оросын цөөн тоот бага үндэстнүүдээс 133 мянга, оросуудаасаа 20 мянган шинэ цэрэг энэ 2024.10.01-12.31-ний хооронд татаж, утгагүй дайныхаа махны машинд хэрчиж оруулахаар зэхэж буй, Кавказынхан Москва, Ст.Петербург хот руу зэвсэг бөөнөөр нь оруулаад эхлэсэн, Умард Кавказ нь фронт орчмын бүс болох дөхөж байгаа, ОХУ Трампад шал дэмий итгэж горьдож, тэр нь санаснаар болохгүй зэргийг нуршихгүйгээр ингэхэд Орос ямар хариу цохилт амсах, амсаж байгаа тухай хөрвүүлж буулгая. 


Оросууд, улс төрчид нь Трампад үнэхээр “напрасно” итгэж байна. АНУ-ын сонгууль дайны явцыг өөрчилж чадна гэж үү? Ажиглаад байхад бүгд л 2024 оны намрын АНУ-ын сонгуулийг хүлээгээд байх шиг. Дэлхий дэх халуун цэгүүдийн цаашдын хувь заяаг тэр сонгууль орвонгоор нь эргүүлэх үү? Израильд ч, Украинд ч, бүр Иранд, Хятадад, ялангуяа ОХУ-д хүлээлт үүсгэсэн нь үр дүнгээ үзэх үү? Орост элитүүдийн дунд дайнаа дуусгах тухай ил далд ярилцаад эхэлжээ. “Путингүй Орос!” гэсэн далд уриа дуудлага яваад байх шиг. Дайны бүх бурууг түүнд тохоод өөрсдөө уснаас хуурай гарах гэсэн ов мэх! Бүр Москвад цэргийн эргэлт гарах, Путиныг хорлох, устгах явдал магадлалтай гээд элдэв сайтуудад шуугиад эхэлжээ.


Германы Bild сэтгүүлд Польшийн ЗХЖШ-ын экс-дарга Раймунд Анжейчак гэдэг генерал ноцтой зүйл ярьсныг би хөрвүүлье. Польш ба Прибалтын улсууд Санкт-Петербург руу цохилт өгөх магадлалтай, бэлэн. Хэрэв Оростой мөргөлдсөн, байлдан тохиолдолд тэгнэ гэсэн байх юм. Зохиомж гаргаж ярьжээ. Москвагийн эрх баригчид Украинаа ялсны дараа Эстон, Латви, Литва, эсвэл Польш руу халдана. Тийм тохиолдолд оросын цэрэгтэй хамт белоруссын армийн ангиуд оролцоно. Гэхдээ Прибалт ба Польш бэлтгэлтэй байна. Ердөө оросын цэрэг хил даваад ороод ирлээ л бол тэр даруй шууд хариугаа хүртэнэ. Эхний өдөр биш шүү, эхний ганц минутын дотор! Бид 300 километр радиус доторхи оросын стратегийн бүх объектод цохилт өгнө. Бид Санкт-Петербург руу шууд давшина! Үүний тулд Польш нь одоо 900 километр хүртэл тусдаг 800 пуужин худалдан авах гэж байна. Түүнийгээ Оростой мөргөлдсөн тохиолдолд хэрэглэнэ гэжээ.


Оросууд Польшийн нутаг дэвсгэрт довтолсон тохиолдолд оросын пуужингуудыг сөнөөх Америкийн пуужингийн довтолгооноос хамгаалах бааз Польшид ажиллаж эхэлнэ гэж Польшийн Гадаад хэргийн сайд Радослав Сикорский ярьжээ. Энэ бааз зөвхөн АНУ-ын зүг нисч буй ираны пуужингуудыг төдийгүй Польш руу нисч ирэх оросын пуужингуудыг устгаж чадна гэдгийг бид америкчуудтай тохиролцож баталгаажуулсан гэжээ.


АНУ Украинд “AGM-158B JASSM” гэх шинэ пуужин нийлүүлэх тухай ид ярилцаж байна. Тэдгээр нь Оросын 50 хүртэл мужид хүрч цохилт өгч чадна, хэрэв пуужин нийлүүлж эхэлбэл мөргөлдөөний стратегийн явцыг өөрчилж таарна. “AGM-158A” гэдэг хуучин загварын пуужин гэхэд л 370 километрт тусдаг бол шинэчлэн сайжруулсан “AGM-158B” нь 926 километрт хүрч цохилт өгөх боломжтой. Пуужин дроны довтолгоог урьдчилан тогтоодог систем Израиль Украинд өгөв. Хаанаас ямар пуужин дрон ямар траектороор аль чиглэлд хаана тусах координатыг урьдчилан нарийн тогтоодог системтэй болжээ.


Үүнээс гадна Герман, Бельги, Дани, Норвег улсууд 2024 оны үлдэх хоёр сар хагасын дотор Украинд дахин нэг томхон тусламжийн багц батласан, тэр нь €1.4 тэрбумын үнэ бүхий төрөл бүрийн зэвсэг техник байна хэмээн ХБНГУ-ын канцлер Шольц мэдэгджээ.


Украинтай хил залгаа Оросын бүх мужууд ЧП зарлаад онцгой дэглэмд шилжжээ. Энд тэндгүй тостой бамбар аятай гал авалцан шатаж, “хамгийн сүүлд” гэж тооцож аргагүйгээр зэвсэг сумны агуулахуудыг шөнө алгасахгүй Украин довтолж байна. Брянск мужийн Карачев хотод БХЯ-ны харьяа сумны агуулахад Хойд Солонгосоос нийлүүлсэн сум дөнгөж төвлөрүүлж эхэлж байтал түймэрдчихэв. Өмнөхөн нь Краснодарын хязгаарын Октябрьский тосгоны ойролцоох “шахед”-ын агуулахыг сөнөөсөн, олон зуун ираны нисэгчгүй онгоц шатаж дэлбэрсэн, Адыгей дэх цэргийн аэродром цохилтод өртсөн. Ханская өртөөнд Краснодарын цэргийн нисэх хүчний дээд сургуулийн 272-р бааз галд шатсан. Oросын БХЯ-ны дээд тушаалтнуудыг зөөдөг, тэр ч бүү хэл Дээд ерөнхий командлагч өөрөө залардаг цэргийн тээврийн ТУ-134 онгоцыг (командный самолет) Оренбург-2 цэргийн аэродромд устгажээ. Энэ мэт Оросын ложистикийн артерын судсыг түүж устгаж буй жагсаалт дуусахгүй үргэлжилнэ. ОХУ нь 5 дахь сардаа өдөрт 1000 давсан үхэлтэйгээр бүтэлгүй давшиж байна. Өнгөрсөн 9 дүгээр сард өдөрт дунджаар 1300 цэргээ үхэл рүү нь илгээн байлджээ. Оросууд байлдааны талбарт ийнхүү массаараа үхэж үрэгдэж байна. Бие бүрэлдэхүүнийхээ нөөцийг барж байна. Ийм нөхцөлд нөхөн хангалт хийлгэж нөхцөл байдлыг хянаж байхын тулд Кремлиэс Иран, Хойд Солонгост хандан өвдөг сөхрөн тусламж гуйж байна. Хойд Солонгосын цэрэг фронт руу очлоо гэдгийг Зеленский өөрөө мэдэгдсэн. “Цусаар гагнагдсан найрамдал”-ын махан цусан таташ руу солонгос эрс явж орлоо! Түрүүчээсээ оргоод эхэлсэн.




Баримт юу харуулж байна? Орос том зураглалаараа үхлээ өөртөө бэлтгэсэн, одоо украины пуужин дроны халдлагын дор ямар ч авралгүй болжээ гэдэг нь харагдаж байна. Оросын үзэл суртлын тархи угаалтад үнэмшиж, Путин ялахыг цөхрөн хүлээж, Украин руу хараалаа урсгаж байгаа бол бүтэшгүй цөхрөлөөсөө яаралтай салах болж. Украин ялагдаасай гэж мянгантаа харааж зүхээд нэмэргүй болжээ!


                    Адьяaгийн Батсайхан (бэлтгэл хошууч)