sonin.mn
Сэтгэгдэл (58)

Зөвлөлт Украинд цэргийн дээд сургуульд суралцан төгсгөж зэвсэгт хүчиндээ зүтгэж явсан олон арван офицерын нэгийн хувьд дайн байлдаан, давшилт хориглолтын талаар энгийн иргэдийг бодвол гадарлана. Тэр мэдлэг туршлагаараа өнөөгийн Орос-Украины энэ дайныг харж, оперативын цагийн байдлыг үнэлдэг. Фронтын мэдээнүүдээс үзвэл Оросын зэвсэгт хүчин стратеги–оперативын нөөцөө бараад, асар их зэвсэг, сум, пуужингийн агуулахуудаа дэлбэлүүлээд одоо Оросынхоо нутагт байлдах гэж тамтай зам туулж Сталины хатуу тушаал руу шилжихээс өөр аргагүй болж байгаа тухай хөрвүүлж буулгая.

 

Курскийн операцын тухайд Украины ялалтын төлөвлөгөөний нэг хэсэг нь гэдгийг В.Зеленский өөрөө тэмдэглэсэн. “Бид Курск мужид шинэ ажиллагаа эхлүүлж байгаа бөгөөд оросуудад илүү том газар нутгаа орхих, эсвэл бүслэгдэх хоёрхон сонголт байгаа” хэмээн украины цэргийн нэг зүтгэлтэн ТВ-ээр ярьж байна.


Түүний ярьснаар украины цэргүүд Оросын энэ муж руу Глушково чиглэлээр оросын хилийг нэвтрэн довтолжээ. “Ямар ч ноцтой эсэргүүцэл харагдаагүй, зам нь сайн байсан. Весёлое тосгон нь оросын зэвсэгт хүчний бүлгийн арын хэсэгт байрладаг. Энэ нь оросын армийн понтон гарцууд байрладаг Глушково руу явах зам дагуу”, “Ингэснээр Курскт оросууд хүнд байдалд орлоо” гэж оросын сувгууд ч ам уралдан өөрсдөө мэдээлж байна. Курсктээ Орос үлэмж хүч хаяж чөлөөлөх ажиллагаа эхлүүлэн байлдаж байтал Украины арми төлөвлөгөөний дараагийн үе рүү орж, байлдаж байгаа фронтын хажуу хэсгээр Оросын нутаг руу ямар ч эсэргүүцэлгүй цөмрөн орж Оросын цэргийн хажуу талаас ороох бүслэх маягтай урагшилж байна. Маш сайн тооцож төлөвлөсөн ажиллагаа бололтой.

 

Ийнхүү Украин нь ОХУ-ын Курск муж руу цэрэг оруулаад бараг 2 сарыг туулах гэж байна. Курскийн операц нь гурван зорилго өмнөө тавьсан, тэр нь нэгдүгээрт Украины Сума мужид оросын цэргийн давшилтыг тасалдуулах, хоёрдугаарт бусад фронтоос цэргээ Орос татаж байлдуулахаас аргагүй болгох, гуравдугаарт буфер бүс байгуулах хэмээн генерал Игорь Романенко Obozrevatel сайтад ярилцлага өгөхдөө тэмдэглэв. Ийнхүү ОХУ-ын муж руу амжилттай давшсанаараа Харьков, Сумад оросын цэргийн давшилтыг саатуулж чадлаа. Хоёрдахь зорилтын тухайд юуны өмнө дорнод фронтоос Орос 15-20 мянган цэргээ (Зеленскийн хэлснээр 40 мянга) татаж нутгаа хамгаалуулахаар хөдөлжээ. Одоо буфер бүс байгуулах зорилтоо шийднэ гэжээ. Тэгж шийдэхийн тулд дөнгөж сая хилийн өөр нэг хэсгээр украины десантын-дайрагч нэг бригад Курскийг нэвтэрч саадгүй урагшилсан, тэр нь 8 дугаар сарын 6-нд эхлүүлсэн операцын дараагийн шинэ үе болох бололтой. 


Үүнтэй холбогдуулан саяхан Оросын ТВ-ээр оросын нэртэй найруулагч Никита Михалков ярьж байгаа нь харагдав. Шууд л ял нэхэж буруутныг хайж байна. Путиныг аягүйттэл асуужээ. “15 тэрбум рублиэр хийж байгуулсан Курск дэх оросын армийн бэхлэлт хайчсан бэ?” Үнэхээр хайчсан юм бол? Учиргүй их гурвалжин цагаан бетон эгнүүлээд байсан. Тэр их зардал хэний дансанд орсон бэ?


Курскээ алдахгүйн тулд Кремльд нөөц хувилбар яригдаж байна. Цэргийнхэн ч шаардаж байна:–Оргосон, хулчийсан цэрэг, захирагч нарыг газар дээр нь өчиггүй буудах тухай Сталины “Приказ № 270”, бас № 227 буюу нэг алхам ч ухарч болохгүй, ухарвал... Өглөө босоход орчлон дэлхий дээр сонин сайхан зүйл их л тохиосон байх юм. Нэг өглөө Сталины тушаал нь Путины нэрээр гараад ирнэ, тэр гарцаагүй. Нэмж хэлэхэд Украины тал “Олзлогдогсодоор солилцооны санг нөхөх” гэдэг арга барилтай ажилладаг, аль болох олон орос цэрэг амьдаараа бууж өгвөл сайн, тэднийг нөөцөлж байгаад оросын олзонд байгаа (зарим нь бүр 2 жил) украин цэргүүдээрээ солих. Ер нь Сталины дайны урлагийг Путин бүрэн өвлөсөн. Цаазаар авахаас бусдаар. Эзэлж (өөрсдөө бол чөлөөлөх гэдэг) чадахгүй бол тэр хот тосгоныг газрын хөрстэй нь тэгширтэл их буугаар галлаж, бөмбөгдөж пуужинддаг. 


“Чи минийх болохгүй бол өөр хэнийх ч болохгүй!” гээд там болгодог. Орос энэ арга тактикаа Украинд шувтан амсуулж байна. Харин Украин нь Оросын хот тосгод, ядаж Орост түр эзлэгдээд байгаа хотуудаа хэзээ ч газрын хөрстэй нь тэгширтэл бөмбөгдөхгүй. Оросын суртал нэвтрүүлэгчид яг өөрсөд шигээ бодож ТВ-ээр хашгиралдаж харагдана:–Одоо биднийг, бидний гэр орныг цаадуул чинь яг бөмбөгдөнө гэж. Украины хүн ардыг Орос яг тэгж байгааг нэг ёсондоо хүлээн зөвшөөрчихсөн.

 

Юлия Навальная баривчлах тушаалыг нь эгдүүцэж “Путиныг бүү мартаарай. Тэр бол алуурчин, дайны гэмт хэрэгтэн. Түүний байх ёстой газар бол шорон. Гаагын хаа нэгтээ, зурагттай тохилог өрөөнд бус Орост Алексейг хөнөөсөн колони шиг газар байх ёстой” гэж мэдэгдэж байсан даа. Навальнаягийн ерөөснөөр яллагдах өдөр ойртсон мэт Орост, Оросын армид болж бүтэж байгаа юм алга. Наад захын жишээ барагдахгүй их боллоо. Барууныханд эр бяраа гайхуулж хүчээ үзүүлэхээр тив хоорондын РС-28 “Сармат” пуужингаа хөөргөх гэтэл уурхай дотроо дэлбэрч бөөн гамшиг дагууллаа. Дөрөв дэх удаагаа бүтэлгүйтлээ. Архангельск мужийн Плесецк дэх сансрын пуужингийн хөөргөх полигон нэг хэсэгтээ жагсаалаас гарлаа. Энэхүү РС-28 “Сармат” нь хуучин загварын комплекс РС-20В “Воевода” пуужинг халж гарч ирсэн, Оросын цөмийн хүчний шинэчлэлийн чухал үзүүлэлт ба хүнд нь 200 тонн орчим, дэлхийн дээр хамгийн хүнд баллистик пуужин гэгддэг, урт нь 35 метр, диаметр нь 3 метр, 18 мянган км тусгалтай.


Нэг дор толгойн хэсэг нь 10-15 салдаг цөмийн бөмбөгнүүд тээнэ, нийт хөнөөх хүчин чадал нь 50 мегатонн. Украинд бүтэлгүйтэх тусмаа Вашингтон, Лондон, Варшавыг “Сармат”-аар цөмийн галд хуйхлана гэж оросын суртал нэвтрүүлэгчид амаа цангатал занадаг, харамсалтай нь ийм төрлийн 4 пуужингаа турших гэж байж сүйтгэчихлээ.


Сансраас авсан зурганд асар том хар нүх харагдана. Краснодарскийн Молькино дахь Вагнерын бааз цохилтод өртөв. Калуга муж дахь оросын стратегийн бөмбөгдөгч пуужин харвагч ТУ-22М онгоцуудыг баазад нь Украин дроноор бөмбөгдчихөв. Украины хот суурин, хүн ард руу байнга пуужин харвадаг онгоцууд цөөрч л байна. Пуужин ч энэ олон дэлбэрэлтийн дараа үлэмж цөөрсөн байх. ОХУ-ын Европын хэсэг дэх цэрэг-зэвсгийн бүх бааз, агуулах энэ янзаараа Украины цохилтын бай болох бололтой. Эндээс юу харагдаж байна. Эрүүл ухаантай монгол хүн бол ойлгохоор болсон. Оросын үзэл суртлын тархи угаалтад төөрч будилж, Путин ялахыг хүсэн хүлээж, тэр талын суртал нэвтрүүлэгт хөөрч, хараалаа урсгаж байгаа бол Та бүтэшгүй цөхрөлөөсөө яаралтай салах хэрэгтэй. Украин ялагдаасай гэж мянгантаа залбирч ном уншуулаад ч өнгөрлөө дөө!

 


Адьяaгийн Батсайхан (бэлтгэл хошууч)