sonin.mn
Сэтгэгдэл (55)

Хөгжил гэж юу вэ? Ер нь ямар улс, оронг хөгжсөн гэж хэлэх вэ? Энэ асуултын хариу маш олон. Гэхдээ хамгийн оновчтой нь тухайн оронд шударга ёс тогтож гэмээн өндөр хөгжилтэй орон болдог гэх хариулт. Учир нь шударга ёс байж л баялгийн хувиарлалт тэгш болж, ард түмний амьдрал сайжирдаг.


Монголд шударга ёс сэргэн мандаж, хуульт ёс засаглаж байсан зурвасхан үе бол 2009-2017 он байсан юм. Ардчилсан Ерөнхийлөгч Ц.Элбэгдоржийн үед л Монголчууд шударга ёс гэж ямар сайхан юм бэ? шударга ёс тогтохыг л чухамдаа хөгжил гэдэг юм байна гэдгийг биеэрээ мэдэрсэн билээ.


 Мэдээж Ц.Элбэгдорж шударга ёсыг тогтоох их үйл хэргээ ганцаараа хийгээгүй. Ерөнхий прокурор асан Д.Дорлигжав, ЕТГ-ын дарга асан П.Цагаан, АТГ, ТЕГ-ын дарга асан, Монголын нэрт генерал Б.Хурц, Ерөнхийлөгчийн хуулийн бодлогын зөвлөх асан Ч.Өнөрбаяр гэх мэт өчүүхэн төдий ч шуналгүй, бусдын төлөө гэсэн сүү шиг цагаан сэтгэлтэй, шударга үнэний туйл болсон хүчирхэг сэхээтнүүдээс бүрдсэн баг түүнд байсан юм. Тэр дундаа хуульч Ч.Өнөрбаяр гэх залуугийн ур ухаан, хуулийн мэдлэг, чадвар Ерөнхийлөгч Ц.Элбэгдоржийн их үйл хэрэгт хамгийн чухал нөлөө үзүүлсэн билээ.

Чухам түүний үнэнч зүтгэлийн хүчинд л Ц.Элбэгдорж шударга ёсыг тогтоох замаар Монгол Улсыг хөгжүүлж чадсан.


Ц.Элбэгдоржийг Монгол төрийн тэргүүн байх үед л Монголд С.Зоригийн хэргийг илрүүлсэн, өөдгүй муу Чимгээ, Содномдаржаа нарыг хашраасан, "Эрдэнэт"-ийн 49 хувийг Монголын шударга бизнесмэн "Сахал" Д.Эрдэнэбилэгийн мэдэлд авчирсан, гадаадын нэрт бизнесмэн Жастин Каплаг суллаж, эх оронд нь буцаасан, Монголын ард түмэнд асар их эд баялаг авчирсан Оюутолгой, Дубайн гэрээ байгуулагдсан гэсэн олон сайхан үйл явдал болсон билээ.


Үүнээс хойш алдагдсан найман жил өнгөрлөө, хөгжил ч удааширав.

Гэвч энэ алдааг засаж, дахин Ц.Элбэгдоржийн үеийн хөгжил цэцэглэлтийг эхлүүлэх боломж гарч ирлээ.


УИХ-ын сонгуулийн 10-р тойрогт буюу Чингэлтэй, Сүхбаатар дүүрэгт АН-аас нэр дэвшиж байгаа Чадраабалын Өнөрбаярыг сонгож чадвал энгүй их хөгжил дэвшил бүхий Элбэгдоржийн эрин үе эргэн ирнэ.


Эргэлзэх хэрэггүй. Ц.Элбэгдоржийг хайрладаг, шүтдэг бүхий л хүмүүс түүний баруун гар шахуу болтлоо найман жил хамтран зүтгэсэн Өнөрбаярт итгээрэй.

Ц.Элбэгдорж Ч.Өнөрбаяртай хамтарч байсныхаа хүчинд л Монголоо хөгжүүлж байсан бол эрдэмт залуу Өнөрбаяр одоо өөрөө эрийн цээнд хэдийн хүрч,Ц.Элбэгдоржтойгоо яг адилхан шилдэг улс төрч болжээ.


Ардчилсан үзэлт Ө.Дамчаадагва