(Мессид зориулав)

Энтропийн дарамт актуализацийг төрүүлсэн. Реалитийн бүтэц задрах, сарних хандлагатай учраас өөрийгөө хадгалахыг эрмэлзсэн аливаа зохион байгуулалт энэ дарамтыг эсэргүүцэх шаардлагатай болдог. Физикийн түвшний диссипатив бүтэц, биологийн түвшний амьдрал нь задралын эсрэг чиглэсэн актуализацийн өөр өөр хэлбэрүүд юм. Тиймээс актуализаци бол дур зоргын үйлдэл бус, энтропийн дарамтад өгч буй зохион байгуулалттай хариу мөн.

Эволюци актуализациудын хоорондын өрсөлдөөнийг төрүүлсэн. Амьд биетүүд амьд үлдэх, үржих, орон зай, нөөцийн төлөө өрсөлдөх болов. Байгалийн шалгарал өөрийн боломжийг илүү үр дүнтэй актуализаци хийж чадсан бүтцийг хадгалж, үүнд бага чадвартайг нь шахан гаргадаг.

Иймээс өрсөлдөөн бол зөвхөн хүний түүхэнд санамсаргүй бий болсон гаж үзэгдэл биш. Энэ нь амьдрал болон хүний байхуйн салшгүй хэсэг юм.

Гэвч биологийн өрсөлдөөн анхдагч хэлбэрээрээ сохор. Түүнд урьдчилан өгөгдсөн ёс суртахууны чиглэл, нийтлэг зорилго, хүчирхийллийг хязгаарлах зарчим байдаггүй. Хүчтэй нь сул доройгоо устгаж, ялагч нь ялагдагчийн орон зай, нөөц, боломжийг эзэмшинэ. Хүн төрөлхтөн ч олон мянган жилийн турш эрх мэдэл, эд баялаг, алдар хүнд, итгэл үнэмшлийн төлөө ийм байдлаар өрсөлдөж ирсэн. Эрх мэдлийн төлөө дайн хийж, эд баялгийн төлөө дээрэмдэж, эзлэн түрэмгийлж, алдар нэрийн төлөө цус урсгаж, итгэл үнэмшлийн нэрээр өөрөөр сэтгэгчдийг хавчин устгаж байлаа.

Соёл өрсөлдөөнийг сохор биологийн тэмцэл хэвээр үлдээгээгүй.

Тэр өрсөлдөөнд энтелехи буюу чиглэл, зорилго, боломжийг төгөлдөржүүлэх дотоод хэлбэр өгсөн. Хүн зөвхөн амьд үлдэх замаар бус, мэдлэг болон урлаг бүтээх, нэр хүнд олох, үнэт зүйлээ хамгаалах, өөрийн чадварыг нээх замаар өөрийгөө актуализаци хийх болов. Ингэснээр өрсөлдөөн нөөцийн төлөөх тэмцлээс хүний өөр өөр боломж, авьяас, үзэл санааны уралдаан болон хувирах нөхцөл бүрджээ.

Гэвч соёл өөрөө хүчирхийллийг устгасангүй. Энтелехи шашин, эзэнт гүрэн, үндэстэн, идеологийн хэлбэр авч, хүмүүс өөрсдийн зорилго, үнэт зүйлийг бусдад хүчээр тулгасаар байв. Өөрөөр хэлбэл соёл өрсөлдөөнд утга, чиглэл өгсөн боловч түүнийг хүчирхийллээс бүрэн салгаж хараахан чадаагүй юм.

Энтелехийн дараагийн актуализаци нь Соён гэгээрэл байлаа. Хүн өөрийн боломжийг бусдыг устгах, эрх чөлөөг нь булаах замаар бус, оюун ухаан, мэдлэг, эрх, дүрэм, харилцан зөвшөөрлөөр хэрэгжүүлж болохыг нээсэн. Соён гэгээрэл өрсөлдөөнийг устгаагүй. Учир нь өрсөлдөөн бол хүний байхуйн салшгүй хэсэг. Харин түүнийг нээлттэй, дүрэмтэй, хүчирхийлэлгүй уралдаан болгон хувиргасан.

Эрх мэдлийн төлөөх өрсөлдөөн иргэний дайн, төрийн эргэлтийн оронд ардчилсан сонгуулиар шийдэгдэх болов.

Эд баялгийн төлөөх өрсөлдөөн дээрэм, хүчээр булаан авалтын оронд хэрэглэгчийн сонголтын төлөөх чөлөөт зах зээлийн уралдаан болж хувирав. Алдар хүндийн төлөөх тэмцэл дайны талбараас спорт, урлаг, шинжлэх ухааны талбарт шилжив. Итгэл үнэмшлийн зөрчил өөрөөр сэтгэгчдийг шатаах, хорих, цаазлах явдал байхаа больж, аргумент, нотолгоо, шүүмжлэлийн уралдаан болсон юм.

Хүчирхийллийн өрсөлдөөнд ялагч нь ялагдагчийн амь нас, эрх чөлөө, өмч хөрөнгө, актуализацийн боломжийг булаан авдаг.

Харин энхтайван өрсөлдөөнд нэг хүний амжилт бусдын боломжийг өргөжүүлж чадна. Шинжлэх ухааны нээлт шинэ нээлтийн суурь болж, зах зээлийн инноваци хэрэглэгчдэд шинэ боломж бий болгож, спортын амжилт өрсөлдөгчдийг улам хөгжихөд түлхэж, хүчтэй аргумент нийтлэг мэдлэгийн өсөлтөд хувь нэмэр оруулдаг.

Ийнхүү энтропийн дарамт актуализацийг төрүүлж, эволюци актуализациудын хоорондын өрсөлдөөнийг бий болгож, соёл тэрхүү өрсөлдөөнд энтелехи өгч, энтелехийн актуализаци Соён гэгээрэлд хүргэсэн байна. Соён гэгээрлийн хамгийн том ололт нь хүмүүсийг өрсөлдөхөө болиход хүргэсэн явдал биш. Харин хүмүүс бие биеэ устгалгүйгээр өрсөлдөж, харин ч бие биеийнхээ актуализацийг өдөөж, харилцан боломжоо өргөжүүлж болох нийгмийн хэлбэрийг бүтээсэн явдал юм.

Жич: Хөл бөмбөг бол үндэстэн улсуудын хоорондын энхтайванч “дайн” билээ.Спорт мандугай

Эрдэнийн Бат-Үүл