УИХ-ын гишүүн, сайд асан С.Баярцогт сэтгүүлчдийн асуултад хариулав.

Энэ үеэрээ тэрээр: "Манай Ардчилсан анх таван намын суурь дээр үүссэн, олон ургалч үзлийн нэгдэл. Ойлголцолд хүрэхийн тулд бүх хүн нэг алхам ухрах хэрэгтэй. Ингэж эв нэгдлийг хангах хүмүүс нь намын дарга, ЕНБДарга байдаг. Одоогийн байдлаар манай намд зургаан фракц бий. Үг хэлж байгаа хүмүүсийн байр сууриас харахад нэг фракц нь эсрэг байр суурьтай байна. Гэхдээ энэ нь бид нэгдэж, нийлж чадахгүй гэсэн үг биш. Би төрийн өндөр албан тушаалыг 23 настайгаас эхэлж хашсан учраас залуу хүмүүст итгэл хүлээлгэвэл даагаад явах чадалтай гэдгийг мэдэж байгаа.

Х.Баттулга бид хоёрыг муу гэж хүмүүс боддог юм шиг байгаа юм. Бид хоёрт асуудал үнэхээр байхгүй, надад үргэлж хамтарч ажиллая гэдэг санал тавьдаг.

Хэрэв би ийм өндөр албан тушаалд очоод, намын ялалтын төлөө явах юм бол Х.Баттулгын шаардлагуудыг нь сонсоод, харилцан буулт хийгээд, хамтраад явах боломжтой.

Ерөөсөө шийдэгддэггүй асуудал гэж байдаггүй. Миний хувьд 1998, 2004, 2008, 2014 оны эвслийн гэрээнүүдийг намынхаа талаас хийж байсан. бид Оюутолгойг бүтээн байгуулсан хүмүүсийг Монголын бахархал байх ёстой гэж боддог. Бид саран дээр эсвэл өөр гараг дээр амьдарч байгаа биш, дэлхийн хамгийн нөлөө бүхий хоёр улсын дунд оршдог. Эдгээр хоёр улс хоёулаа атомын зэвсэгтэй, хүчирхэг армитай, дэлхийн томоохон эдийн засгуудын тоонд ордог.

Үндэсний аюулгүй байдлын үзэл баримтлалд 30:30:40-ийн харьцааг баримталж байж эдийн засгийн аргаар тусгаар тогтнолоо баталгаажуулна гэж заасан байдаг. Өөрөөр хэлбэл, Орос, Хятадтай хийх гадаад худалдаа, хөрөнгө оруулалт тус бүр 30 хувь, харин гуравдагч хөрш орнуудтай 40 хувь байх нь Монгол Улсын хөгжил, эдийн засгийн баталгааг хангана гэж үздэг.

Энэ утгаараа Оюутолгой нь улсын гадаад хөрөнгө оруулалтын хамгийн том тэнцвэржүүлэгч болж байна. Оюутолгой шиг гүний буюу босоо аргаар олборлолт явуулдаг технологи дэлхийд цөөн газарт ашиглагддаг. Мөн эдийн засгийн олон хямралын үед ч хамгийн том татвар төлөгч, хамгийн их ажлын байр бий болгогч, жижиг дунд үйлдвэрлэлийг дэмжигч томоохон бүтээн байгуулалт болж чадсан.

Гэсэн хэдий ч уг орд нь эрх мэдэлтэй албан тушаалтнуудын ашиг сонирхлын талбар болсон гэх шүүмжлэл бий. Учир нь Оюутолгойг эзэмшиж буй компани Канадын хөрөнгийн биржид бүртгэлтэй тул хувьцааны үнэ болон санхүүгийн мэдээлэл нь тодорхой хэмжээнд ил тод байдаг.

Манай улсад хамгийн их дутагдаж буй зүйл бол ил тод байдал.

Оюутолгойтой холбоотой асуудлууд үүсэж буй гол шалтгаан нь гэрээ, хэлцлүүдийг нууцалсантай холбоотой. Хэрэв эдгээр тайлан, гэрээг бүрэн ил тод болгож, олон нийт чөлөөтэй танилцан, зөв бурууг нь шүүмжлэх боломжийг бүрдүүлбэл энэ нь компанийн засаглалын хувьд үлгэр жишээ, сайн төсөл болох бүрэн боломжтой." гэлээ.

Б.Төгсбаясгалан