sonin.mn
Сэтгэгдэл (16)

Хуульч Ц.Оюунбаатар, эдийн засагч Х.Батсуурь нар УИХ-ын гишүүн Л.Оюун-Эрдэнийг Монгол улсын Үндэсний аюулгүй байдалд ноцтой хор хохирол учруулсан хэргээр шалгуулахаар ТЕГ-т өглөө.


Энэ тухайгаа тэд: "Монгол Улсын Ерөнхий сайдаар ажиллаж байсан, өнөөгийн УИХ-ын гишүүн Л.Оюун-Эрдэнэтэй холбоотой, Монгол Улсын үндэсний болон эдийн засгийн аюулгүй байдалд ноцтой хор уршиг учруулж болзошгүй асуудлыг шалгуулахаар бид Тагнуулын ерөнхий газарт хандсан. Мөн бид Авлигатай тэмцэх газрын Олон нийтийн зөвлөлтэй хамтран 2026 оны 4 дүгээр сарын 3-ны өдөр хэвлэлийн бага хурал зохион байгуулж, дээрх асуудлуудыг олон нийтэд ил болгосон.


Уг үеэр үндэсний болон эдийн засгийн аюулгүй байдалтай холбоотой ноцтой асуудлуудыг төрийн тусгай албад, цагдаагийн болон тагнуулын байгууллагууд шалгах шаардлагатай гэсэн байр суурийг илэрхийлсэн. Гэвч үүнээс хойш нэг сарын хугацаа өнгөрсөн боловч дээрх асуудлаар тодорхой шийдвэр, хариу одоогоор гараагүй байна.


Түүнчлэн 2026 оны 3 дугаар сарын 11-ний өдөр “NTV” телевизийн “Лхагвын тойм” нэвтрүүлгийн үеэр УИХ-ын гишүүн Л.Оюун-Эрдэнэ нь улсын нууцтай холбоогүй атлаа Монгол Улсын тусгаар тогтнол, үндэсний болон эдийн засгийн аюулгүй байдалтай холбоотой асуудлыг хөндөн ярьсан. Мөн парламентийн засаглалд халдах оролдлого гарвал ард иргэдийг төв талбайд жагсаал цуглаан хийхийг дахин уриална хэмээн мэдэгдсэн.


Түүнчлэн УИХ-ын гишүүдийг эгүүлэн татах тухай хууль болон сүүлийн 30 жилийн хугацаанд ёс зүйгүй, авлига, хээл хахуультай холбоотой асуудлуудын талаар ард иргэдийн шаардлагыг эсэргүүцсэн байр суурь илэрхийлсэн нь нийгмийг хуваах, ард иргэдийг талцуулах эрсдэлтэй гэж үзэж байна.


Иймд дээрх нөхцөл байдлыг дүгнэж үзэхэд ард иргэдийн эв нэгдлийг алдагдуулах, нийгмийг хагалан бутаргах, улмаар тогтворгүй байдал үүсгэх эрсдэлийг бий болгож болзошгүй гэж үзэж байна. Монголын төрийн удирдлагууд түүхийн хугацаанд хариуцлагаа өөрсдөө хүлээж ирсэн болохоос бус, ард иргэдээ хагалан бутаргах, эв нэгдлийг алдагдуулах үйлдэл гаргаж байгаагүй билээ." гэв.


Б.Төгсбаясгалан