sonin.mn
Сэтгэгдэл (5)

Үнэн ба Зөв намын удирдлагууд мэдээлэл хийв.

Энэ үеэр тус намын дэд дарга М.Уранчимэг: "Өнөөдөр Монгол Улсад төрийн бодлого, санал асуулга, Улсын Их Хурлын гишүүдийг эргүүлэн татах тухай хуулийн асуудал яригдаж байгаатай холбоотойгоор төрийн бодлого гацсан байдал үүсээд байна. Үүнийг та бүхэн мэдэж байгаа.


Бидний байр суурь бол төрийн бодлого ямар ч нөхцөлд гацах ёсгүй. Эрх баригчдын эрх ямбаас илүүтэйгээр иргэдийн нийгмийн асуудал нэн тэргүүнд тавигдах ёстой гэж үзэж байна. Иймээс энэ агуулгын хүрээнд 4 дүгээр сарын 14-ний өдөр “Бүх ард түмний хаврын чуулган”-ыг зарлан хуралдуулах товыг албан ёсоор зарлаад байна.



Өнгөрсөн өдрүүдэд бид энэхүү мэдээллийг өөрсдийн албан ёсны цахим сувгуудаар түгээсэн. Үүний дагуу Монгол Улсын 21 аймаг, 330 сум, нийслэлийн 9 дүүргээс, нийгмийн бүх салбарын төлөөллүүд оролцохоо илэрхийлж байна.



Тухайлбал, эрдэмтэн судлаачид, багш нар, эмч нар, нийгмийн идэвхтэй оюутан залуучууд, мөн төрийн болон төрийн бус байгууллагууд оролцож, нэгдэх хүсэлтээ ирүүлж байна.


Энэ бүхнээс харахад өнөөгийн парламентын үйл ажиллагаанд иргэдийн өгч буй үнэлэлт тодорхой байна. Хэрэв төр үүргээ биелүүлэхгүй, ажлаа хийхгүй байгаа бол иргэд өөрсдөө санаачилга гарган, асуудлын шийдлийг эрэлхийлэх ёстой гэсэн ойлголт давамгайлж байна.


Иймээс бид хариуцлага тооцох, бодит шийдэл гаргах гарц гаргалгааг хамтдаа хэлэлцэх зорилгоор энэхүү “Бүх ард түмний хаврын чуулган”-ыг зохион байгуулахаар шийдвэрлээд байна." гэлээ.


Б.Төгсбаясгалан