sonin.mn
Сэтгэгдэл (9)

Ардчилсан намын нэр бүхий гишүүд дотоод сонгуультай холбогдуулж ЕС асан Л.Оюун-Эрдэнийн бүлэглэлийнхэн АН-ыг худалдаж авч байна сэдвээр мэдээлэл хийлээ.


Энэ үеэр АН-ын гишүүн Д.Монголхүү: "Ардчилсан намын сонгуультай холбоотой асуудлаар Бат-Амгалан гэх хүн МАН-ын гишүүдийг Ардчилсан намд бүртгүүлэх үүрэг, даалгавар өгсөн талаар Х.Нямбаатар ярьсан байна. Энэ нь зөвхөн Ардчилсан намын дотоод үйл ажиллагаатай холбоотой асуудал биш юм. Харин ч маш ноцтой, үндэсний аюулгүй байдлын хэмжээнд хүрэхүйц асуудал болоод байна. Гэвч хүмүүс энэ өнцгийг төдийлөн анхаарч, олж харахгүй байгаа учраас энэхүү хэвлэлийн хурлаар дамжуулан онцлон хэлэхийг хүсэж байна.


Улс төрийн нам гэдэг нь улсынхаа бодлогыг тодорхойлоход оролцож, төрийн эрхийг авах зорилготой байгууллага. Гэтэл ийм зорилготой байгууллага өнөөдөр ийм хүнд нөхцөл байдалд орчихоод байна.


Нямбаатар энэ мэдэгдлийг хийснээс хойш ердөө хоёрхон хоногийн дараа АН-д 6000 гишүүн шинээр элссэн талаар манай намын Ерөнхий нарийн бичгийн дарга мэдэгдсэн. Энэ нь зүгээр нэг иргэдийн яриа биш, харин хариуцлагатай албан тушаалтнуудын баримтад тулгуурласан мэдээлэл юм. Иймд энэ нь зүгээр нэг хардлага биш, тодорхой баримт, нотолгоонд үндэслэсэн асуудал гэж үзэж байна. Үүнээс өөр ямар баримт, нотолгоо шаардлагатай вэ?


Хаанаас, хэн, ямар санхүүжилтээр, ямар үүрэг даалгаврын дагуу Ардчилсан нам руу ийм үйл ажиллагаа явуулж байгааг цагдаагийн байгууллага яагаад шалгахгүй байна вэ? Тагнуулын байгууллага юу хийж байна вэ?


Энд үндэсний аюулгүй байдлын асуудал хөндөгдөж байгааг онцлон анхааруулах нь зүйтэй. " гэсэн бол АН-ын гишүүн Ц.Уянга: "МАН-ын нүүрсний хулгайчид улс төрийн нөхцөл байдлаас болж шахагдан гарахаас айн АН-ыг худалдаж авч байгаа юм байна. Бүр тодруулбал "Женко"-той нэг тал болж явдаг Л.Оюун-Эрдэнийнхэн талынхан ийм алхам хийж байна" гэсэн юм.



Б.Төгсбаясгалан