sonin.mn
Сэтгэгдэл (22)

Монголын Ардчилсан холбооны төв байранд /11-р хороолол Ардчиллын ордон/ АН-ын шинэчилсэн бүртгэлд хамрагдсан гишүүдэд Ардчиллын Гэрэгэ гардуулах ёслол боллоо. Ёслолд Монгол Улсын 5 дахь Ерөнхийлөгч УИХ-ын гишүүн Х.Баттулга, УИХ-ын гишүүн, АН-ын дарга О.Цогтгэрэл нар оролцов.


Энэ үеэр Монгол Улсын 5 дахь Ерөнхийлөгч УИХ-ын гишүүн Х.Баттулга: "Тэртээх 1990 оны цагаан морин жилийн ардчилсан хувьсгал бол Монголын ард түмний зориг, эв нэгдлийн ялалт байсан түүхэн үйл явдал юм. 1990 онд монголчууд эрх чөлөө, шударга ёс, хүний эрхийн төлөө нэгэн зүгт нэгдэж чадсан билээ. Энэхүү нэгдэл Монгол Улсыг шинэ замд хөтөлж, өнөөдрийн ардчилсан нийгмийн суурийг тавьсан юм.


Ардчиллын гэрээ бол зөвхөн дурсгал биш. Энэ бол бидний эв нэгдэл, нэгдмэл үнэт зүйл, эрх чөлөөний билэг тэмдэг юм. Монгол хүн бүрийн зүрхэнд эх орноо гэсэн хайр, тусгаар тогтнолоо хамгаалах итгэл, нэгэн зорилгын төлөө нэгдэх хүч оршдог.


Бид үзэл бодлоороо өөр байж болно, байр суурь ялгаатай байж болно. Гэвч Монгол Улсын тусгаар тогтнол, ард түмний эв нэгдэл, нэгдмэл үнэт зүйл дээр бид хэзээд нэг байх учиртай. Өнөөдөр бидэнд хамгийн хэрэгтэй зүйл бол эв нэгдэл. Хөгжлийн үндэс бол нэгдмэл үнэт зүйл юм. Ирээдүйн баталгаа бол Монгол хүний бахархал юм. Цагаан морин жилийн хувьсгалын гал унтраагүй. Тэр гал бол Монголын ард түмний эв нэгдлийн гал, эрх чөлөөний гал голомт байх болтугай. Бид энэ галыг үеийн үед асааж, эх орныхоо ирээдүйг хамтдаа бүтээх ёстой. Хөх тэнгэр ивээх болтугай." гэсэн бол 


УИХ-ын гишүүн, АН-ын дарга О.Цогтгэрэл Шинэ гарах Гал морин жил бол ээлжит нэг цаг тооны жил биш. Энэ нь монголчуудын хувьд, ардчиллыг дэмжигчдийн хувьд ардчиллын төлөөх томоохон үйл хэрэг эхлүүлэх жил байх болно гэдэгт миний хувьд огтхон ч эргэлзэхгүй байна. 2025 оны 8 дугаар сарын 31-ний өдөр Ардчилсан намын даргын сонгууль болсон. Энэ сонгуулийн үеэр би нийт сонгогч, гишүүддээ хоёр зүйлийг онцгойлон хэлж байсан.


Нэгдүгээрт, Монгол Улсын тусгаар тогтнол, эрх чөлөөт байдлын баталгаа нь ардчилал юм. Ардчилсан Монгол Улсын хөгжил дэвшлийн баталгаа нь Ардчилсан нам байна. Монгол Улсынхаа хөгжил дэвшилд хувь нэмэр оруулахын тулд улс төрийн сонгуулиудад дараалсан давхар ялалт байгуулах шаардлага бидэнд бий гэж хэлж байсан.Ардчилсан нам 36 жилийн түүхэндээ давхар ялж, ардчиллаа баталгаажуулах бодлогоо хэрэгжүүлж, амлалтаар биш, ажил хэргээр ялалт байгуулах шаардлагатай.


Хоёрдугаарт, давхар ялалтын төлөө Ардчилсан нам илүү зохион байгуулалттай, илүү системтэй, цэгцтэй нам болж өөрчлөгдөх шаардлагатай. Бид гурван өдрийн лайк, шэйрийн төлөө биш. Бид гурван жилийн дараа үр дүн нь мэдрэгдэх эрс шинэчлэлийн төлөө явах ёстой. Мөн 30 жилийн дараа сайшаагдах Монгол Улсын хөгжил дэвшлийн төлөө ажиллах ёстой гэлээ.



Н.Отгончимэг