УИХ-ын 2024 оны сонгуулийн үр дүнгээр байгуулагдсан Засгийн газарт ХҮН нам орж, Шадар сайд, Боловсролын сайдын суудлыг авч, цөөнгүй намын гишүүд нь Боловсролын яам болон Шадар сайдын ажлын албанд ажиллах болсон.

Анх энэ шийдвэр нь “шинэ үеийн улс төр”, “мэргэшсэн засаглал” бий болох юм биш биз гэсэн найдварын олон нийтэд төрүүлж байлаа. Гэвч бодит байдал дээр боловсролын салбарын бодлого, удирдлагын түвшинд тогтворгүй байдал, маргаан, шүүмжлэл тасрахгүй үргэлжилж байна.

Боловсролын сайд П.Наранбаярын гаргасан шийдвэрүүд олон нийтийн эсэргүүцэлтэй удаа дараа тулгарсан. Тэрбээр олон нийтийн дунд нэр хүндээ унагаж, шүүмжлэлд өртсөн анхны сайд нарын нэг болж, бүр олон нийтийн арга хэмжээн дээр өндөг шидүүлсэн дуулиан хүртэл гарсан нь төрийн сайдын хувьд байж боломгүй явдал юм. Түүний хэвлэлийн төлөөлөгчтэй холбоотой зодооны асуудал, намын дотоод маргаан, улмаар УИХ дахь намын зөвлөлийн даргатайгаа зөрчилдөж, зодуулсан гэх мэдээллүүд ч хэвлэл мэдээллээр гарсан. Үүнээс гадна Боловсролын зээлийн сангийн захирал асан н.Сийлэгмаа гэгчийн хэрүүл, талцал, дотоод хагарал зэрэг нь уг яаманд боловсролын салбарын бодлогоос илүү намын дотоод тэмцэл давамгайлж байгааг харуулж байна. Багш нарын цалин, боловсролын санхүүжилтийн бодлого дээр ч нийгмийн бухимдал хуримтлагдсаар, П.Наранбаярыг огцруулах шаардлагыг УИХ-ын гишүүд болон олон нийт удаа дараа гаргасаар байна.

Боловсрол бол улс орны ирээдүйн үндэс. Энэ салбар улс төрийн туршилтын талбар байж болохгүй. Намын дотоод зөрчил, улс төрийн пиар, хувь хүний амбицын золиос болох ёсгүй.

Иймээс Ерөнхий сайд Г.Занданшатар Үндсэн хуулиар олгогдсон бүрэн эрхийнхээ хүрээнд Боловсролын сайдын асуудлыг зоригтойгоор шийдвэрлэх цаг ирсэн. Засгийн газрын тогтвортой байдал, боловсролын салбарын нэр хүнд, бодлогын залгамж чанарыг бодвол П.Наранбаярыг огцруулах нь улс төрийн хувьд төдийгүй нийгмийн хувьд ч зөв шийдэл байж мэднэ. Шулуухан хэлэхэд, Боловсролын яамаа улс төрийн туршлагагүй, дотоод зөрчилтэй, бодлогоос илүү намын ашиг сонирхол ярьдаг бүлэглэлээс эртхэн шиг салгах хэрэгтэй. Боловсрол бол намын квот биш. Боловсрол бол Монголын ирээдүй юм.

Н.Отгончимэг