sonin.mn
Сэтгэгдэл (2)

Японы геологчдын явуулсан хайгуулын явцад далайн 6 мянган метрийн гүнд байгаа газрын ховор элементүүдийг агуулсан тунамал чулуулгуудыг олж илрүүлжээ. Энэ тухай Японы засгийн газар өнөөдөр мэдэгдлээ.


Усны гүнд өрөмдлөг хийдэг “Чикю” хэмээх судалгааны хөлөг онгоц Японд харьяалагддаг Номхон далай дахь Минамитори шүрэн арлын орчмын уснаас дээрх тунамал чулуулгуудыг илрүүлсэн байна. Таамаг үнэлгээгээр, тэнд 16 сая орчим тонн газрын ховор элементүүд байж магадгүй бөгөөд хэрвээ батлагдвал энэ нь дэлхий дээрх хамгийн том ордуудын нэг болох юм. 


Хэрвээ эдгээр элементийг байнга олборлож чадвал аж үйлдвэрийн гол салбаруудад зориулсан нийлүүлэлтийн дотоод сүлжээ бий болж, Хятадын газрын ховор элементүүдээс хамааралт байдлыг багасгана гэж Олон улсын стратегийн судалгааны хүрээлэнгийн ажилтан Такахиро Камисүна ярилаа.


Өнгөрсөн оны 11 дүгээр сард Японы Ерөнхий сайд Такаичи мэдэгдэхдээ, Хятад улс Тайвань руу довтлох аваас Японы тал үүнийг өөрийн бүрэн эрхт байдалд халдсантай адилтган үзнэ гэсэн юм.


Энэ мэдэгдлийг Хятадын тал эрс буруушааж, хэлсэн үгнээсээ татгалзахыг Такаичигээс шаардсан билээ. Ингээд нэгдүгээр сарын 6-нд Хятадын Худалдааны яам давхар зориулалттай бүтээгдэхүүнийг Японд нийлүүлэхийг хориглосноо зарласан юм. Ийм бүтээгдэхүүнүүдийн жагсаалтад газрын ховор элементүүд багтдаг ажээ. Газрын ховор элементүүдийн батлагдсан нөөцийн хэмжээгээр Хятад улс /44 сая тн/ тэргүүлдэг бол Вьетнам /22 сая тн/, Бразил /21 сая тн/, Орос /10 сая тн/, Гренланд /2 сая тн/ удаалдаг байна. 



Б.Адъяахүү