Мягмар - 01 сарын 06,
2026
МЕХИКО, 2026 оны нэгдүгээр сарын 5 /RIA Novosti/. АНУ, Венесуэлийн хооронд хөндлөнгөөс үл оролцох зарчимд суурилсан тэнцвэртэй, хүндэтгэлтэй олон улсын харилцааг бий болгохыг эн тэргүүний зорилт гэж бид үзэж байна гэж Венесуэлийн ерөнхийлөгчийн үүрэг гүйцэтгэгч Делси Родригез сайд нарын зөвлөлийн хурлын дараа мэдэгджээ.
"АНУ, Венесуэлийн хооронд, мөн Венесуэл ба бүс нутгийн улс орнуудын хооронд эрх тэгш байдал, дотоод хэрэгт хөндлөнгөөс үл оролцох зарчмууд дээр суурилсан тэнцвэртэй, хүндэтгэлтэй олон улсын харилцааг бий болгохыг бид эн тэргүүний зорилт гэж үзэж байна.
Чухам эдгээр нь дэлхийн бүх улс оронтой харилцах манай улсын дипломат бодлогын үндэс суурь болсон зарчим юм" гэж Родригез Телеграм сувгийн хуудсандаа бичжээ.Тэрбээр мөн Венесуэл улс энх тайвныг эрхэмлэсэн хэвээр байгаа бөгөөд харилцан хүндэтгэсэн, олон улсын хамтын ажиллагаанд суурилсан орчинд оршин байхыг эрмэлзэж байгааг нэмж дурдсан байна. “Дэлхий дахины бат бөх энх тайван нь улс орон бүрд энх тайвныг баталгаажуулахаас эхэлдэг хэмээн бид үздэг” гэж Родригес онцолжээ. Тэрбээр мөн АНУ-ын Ерөнхийлөгч Д.Трампад хандан энх тайвныг дэмжихийг уриалсан байна.
“Манай ард түмэн, манай бүс нутаг нь дайныг бус харин энх тайван, яриа хэлэлцээг хүсдэг… Энэ бол миний итгэдэг, миний амьдралаа зориулсан Венесуэл бөгөөд миний мөрөөдөл бол Венесуэлийг хүчирхэг улс болгох явдал юм” гэж ерөнхийлөгчийн үүрэг гүйцэтгэгч бичсэн байна.
Родригес ийнхүү энх тайванд уриалж байх үеэр Д.Трамп сэтгүүлчдэд хэлэхдээ, АНУ одоо Венесуэлийг удирдаж байгаа гэж мэдэгдээд, Венесуэлийг “үхэж мөхсөн” улс гэж нэрлэжээ. Мөн цаг нь болохоор Венесуэлд сонгууль явагдана хэмээн Цагаан ордны тэргүүн нэмж хэлсэн байна.
Д.Жаргал
Эх сурвалж: "Монцамэ" агентлаг
Сэтгэгдэл2
2026 оны 1 сарын 3-нд АНУ-ын зэвсэгт хүчин Венесуэльд ЦТА явуулж, хэдхэн цагийн дотор Ерөнхийлөгч Николас Мадурог эхнэртэй нь баривчлав. Одоо Мадуро АНУ-д хоригдож байна. АНУ-ын агаарын хүчин үүрээр Венесуэлийн эрэг хавийн цэргийн хэд хэдэн бааз болон нийслэл Каракас хотод цохилт өгснөөр ЦТА эхэлсэн бөгөөд Венесуэлийн агаараас хамгаалах хүчин юу ч хийж чадаагүй байна. Гэхдээ Венесуэлийн Батлан хамгаалахын сайд амьд бөгөөд бууж өгөхгүй, түрэмгийлэгчидтэй тэмцэж ялалт байгуулна гэх мэдэгдэлийг сая хийжээ. Венесуэльчүүд юу юугүй буугаад өгчихгүй, ширэнгэн ойдоо бүгэж партизаны дайнд шилжих байх гэсэн горьдлого байгаа ч барууныхан Оросын эсрэг Украйныг дэмжсэнтэй адил Венесуэлийг мөнгө, зэвсгээр тултал дэмжиж чадах улс ойр хавьд байхгүй. Далайн чанадаас Хятад, Орос туслах нь мэдээж маш хэцүү.
АНУ Венесуэльд ЦТА явуулсан нь Хятадад том цохилт болов. Хятадууд Венесуэльд 60 гаруй тэрбум ам долларын хөрөнгө оруулалт, зээл өгчээ. Одоо хятадуудын тэр их хөрөнгө оруулалт элсэнд асгасан ус шиг болох гэж байна. Хятадууд Монголд дураараа дургиж байгаа шиг Латин Америкийн улсуудад нөлөөгөө тогтоохоор улайрч байгаа бөгөөд Венесуэль Хятадын хувьд чухал улс байсан. Америкийн цэргүүдэд баривчлагдахын өмнөхөн Мадуро Хятадын Ерөнхийлөгч Ши Жинпиний илгээсэн төлөөлөгчидтэй уулзжээ. Доналд Трамп өнгөрсөн жил Панам улсаас Хятадын нөлөөг шахсан. Одоо Венесуэлиэс шахан гаргаж байна. Трамп Латин Америкт Хятадыг давраахгүй гэдэг үгэндээ хүрч байна.