УИХ дахь АН-ын бүлгийн дарга, АН-ын дарга О.Цогтгэрэл сэтгүүлчдийн асуултад хариулсныг бүрэн эхээр нь сийрүүлэн хүргэж байна.

Гишүүн ээ, өнөөдрийн байдлаар таны бланкан дээр хэчнээн гишүүн гарын үсэг зурсан бэ? Энэ асуудал ямар шатандаа явж байна вэ?

Тооны хувьд бол өргөн барих хуулийн тоонд аль хэдийнээ хүрсэн.

Өчигдөр, уржигдраас эхлээд хэд хоногийн өмнө л 32 хувиас давсан. Манай гишүүдээс хөдөө, гадаа томилолтоор явж байгаа хүмүүс олон байна.

Гэхдээ Ардчилсан намын бүлгийн гишүүд бараг бүгдээрээ дэмжих ёстой гэж би бодож байгаа.

 Танай намын гишүүдээс өөр гишүүд дэмжиж, гарын үсэг зурж байна уу?

 Бид өөр намын гишүүдэд хандаагүй.

 Зарим гишүүд гарын үсэг зураагүй гэсэн үү?

 Тийм ээ. Арав гаруй гишүүдээс байр суурийг нь асуухад “Энэ бол бүлгийн нэгдсэн шийдвэр биш учраас бид өөрсдөө шийдвэрээ гаргасан” гэсэн тайлбар өгсөн.

Гишүүдийн байр суурь янз бүр байгаа юм байна. Тэгэхээр бүлэг хуралдуулах уу?

Шаардлагатай бол бүлэг хуралдуулна.

Бичгээ хэзээ өргөн барих вэ?

Ер нь бол өнөөдөр дөрөв дэх өдөр нь болж байна. Ардын намаас албан ёсны хариугаа өгсөн байх гэж бодож байна. Өргөн барих гишүүдийн гарын үсэг хангалттай бүрдсэн.

Хэрвээ энэ асуудалд “үгүй” гэж хариулбал, Ардын нам ард түмэндээ салаавч өгч байна гэж би ойлгож байгаа.

Өөрөөр хэлбэл, “төрийг улам том болгоно, ард түмний амьдрал доройтож байгаа нь бидэнд хамаагүй, дарга нарын тоог улам нэмнэ” гэж байгаа хэрэг шүү дээ.

Өчигдөр дэд сайд нартай уулзаж, “та нар ажлаа хийгээд, ард түмэнд юу хийж чаддагаа харуул” гэж хэлсэн. Энэ асуудал цаг алдаж байна. Магадгүй өнөөдөр шууд өргөн барих ёстой ч юм бил үү?

Ямар ч байсан бид албан ёсны шаардлагаа өгсөн. Одоо түүнийхээ хариуг авна. Хугацаатай асуудал учраас ярьсаар л байна.

Даваа гарагт Бямбацогт сайдтай уулзахдаа ямар асуудлаар ярилцсан бэ? Тодорхой өөрчлөлт хийх талаар санал солилцсон уу?

Санал солилцсон зүйлүүд бий. Тэр хүрээндээ л ярилцаад гарсан.

Дэд сайдын асуудлыг илүү анхаарах хэрэгтэй гэсэн санал илэрхийлсэн гэж ойлгож болох уу?

 Ер нь янз бүрийн талаас санал, санаа бодлоо солилцох нь хэвийн зүйл.

Тэгэхээр маргааш өргөн барина гэж ойлгож болох уу?

Бид зарчмын шаардлагаа тавиад л явж байна.

Зургаан сайдыг үлдээгээд бусдыг нь эргүүлэн татах, зургаан сайд дэд сайдтай байна гэсэн хувилбар яригдсан. Үүнийг та хүлээж авах уу?

Би албан ёсоор байр сууриа илэрхийлж, шийдвэрээ гаргана гэж бодож байна.

Танай намын гишүүн Эрдэнэсүхийн эхнэртэй холбоотой асуудлаар гишүүнчлэлээс нь хасах талаар танд хандсан уу?

Яг над дээр албан бичиг нь ирээгүй. Нэгдүгээрт, үнэхээр ийм асуудал гарч, манай намын гишүүн холбогдож байгаа нь харамсалтай. Иргэний эрх зөрчигдөж байгаа асуудал ч яригдаж байна. Хоёрдугаарт, энэ асуудлыг хууль, хяналтын байгууллага шалгаж байгаа. Ийм үед бид шууд үнэлэлт, дүгнэлт өгөх нь зохимжгүй гэж бодож байна. Нэгэнт хуулийн байгууллага шалгаж эхэлсэн бол тэд дүгнэлтээ гаргана. Тэр дүгнэлтийг үндэслэж бид шийдвэрээ гаргах нь зөв.

Хэн нэгэн хууль зөрчсөн, иргэний эрх зөрчсөн гишүүнээ бид хаацайлахгүй.

 Албан бичиг ирсэн үү?

 Яг миний гар дээр хараахан ирээгүй байна.

Н.Отгончимэг