sonin.mn
Сэтгэгдэл (40)

БЕРЛИН, 2025 оны арваннэгдүгээр сарын 25 /DW/. Женевт болсон хэлэлцээний дараа Украинд дайныг зогсоох тухай Дональд Трампын засаг захиргаанаас санал болгож буй төлөвлөгөөний заалтуудыг 28-аас 19 болгож цөөрүүлсэн тухай Их Британийн Financial Times болон Америкийн The Washington Post (WP) сонинууд эх сурвалжуудыг эш татан мэдээлжээ. 


Төлөвлөгөөнөөс ямар заалтууд хасагдсан нь тодорхойгүй байгаа бөгөөд хэдэн заалттай байхыг эцэслэн тохиролцоогүй байгаа аж. Уг баримт бичиг “хэвлэлүүдэд гарсан Европын боловсруулсан хувилбаруудын аль нэгэнд нь бус АНУ-аас анх дэвшүүлсэн саналд суурилсан хэвээр байгаа” гэж эх сурвалжууд хэлсэн байна. 


“Европын саналууд “ашигтай” байсан хэдий ч АНУ-ын засаг захиргаа анхны баримт бичгээ баримталсаар байгаа гэж WP-ын эх сурвалж ярьжээ. АНУ-ын төлөөлөгчидтэй Женевт ням гарагт хийсэн хэлэлцээгээр Трампын анхны төлөвлөгөөг өөрчилсөн тухай Украины Үндэсний аюулгүй байдал, батлан хамгаалахын зөвлөлийн нарийн бичгийн дарга Рустем Умеров мэдээлсэн.


Гэхдээ яг ямар өөрчлөлт оруулсныг тэрбээр дурдаагүй юм. “28 заалт бүхий төлөвлөгөөний зарим заалтыг хассан, заримыг нь өөрчилсөн” гэж Украины Ерөнхийлөгчийн тамгын газрын зөвлөх Александр Бевз даваа гарагт Facebook-ийн хуудсандаа бичжээ.


Ням гарагт Германы Канцлер Фридрих Мерц 28 заалттай төлөвлөгөөг нэг заалтад багтаахыг мөн санал болгожээ. DW-д өгсөн ярилцлагадаа Мерц “Оросын царцаасан хөрөнгийг Украинд хөрөнгө оруулж, хөрөнгө оруулалтаас олсон ашгийн тал хувийг АНУ-д өгөх” гэсэн анхны төлөвлөгөөнд тусгасан байсан заалтад ихээхэн сэтгэл дундуур байгаагаа илэрхийлсэн байна. 



Д.Жаргал

Эх сурвалж: "Монцамэ" агентлаг