sonin.mn
Сэтгэгдэл (35)

НАТО-гийн орнууд ирэх дөрвөн жилийн дотор Оросоос ирж болзошгүй халдлагад бэлэн байх ёстой гэж Германы Зэвсэгт хүчний жанжин штабын дарга, генерал Карстен Бройер мэдэгджээ. 


Түүний хэлснээр Орос улс жил бүр 1500 орчим байлдааны танк үйлдвэрлэж байгаа бөгөөд "бүх танкийг Украины дайнд явуулдаггүй, тэдний заримыг агуулахад хадгалж эсвэл үргэлж барууны эсрэг чиглэсэн шинэ цэргийн ангиудад хуваарилж байна" гэж Бройер тэмдэглэсэн байна.


Түүнчлэн Орос улс 2024 онд дөрвөн сая орчим 152 мм-ийн их бууны сум үйлдвэрлэсэн бөгөөд тэд бүгдээрээ Украин дахь байлдааны ажиллагаанд зориулагдаагүй гэжээ. Бройерийн хэлснээр, эдгээр нөөцийг Балтийн орнуудын эсрэг түрэмгийлэл үйлдэх зорилгоор бүтээж байгаа аж. 


"Орос улс 2029 онд довтлоход бэлдэж байж магадгүй гэж шинжээчид тооцоолж байна. Тиймээс бид одооноос эхлэн бэлэн байх ёстой. Ийм зүйл эрт гарахгүй гэх баталгаа бий юу гэвэл үгүй. Тийм учраас бид өнөөдөр батлан хамгаалахад бэлэн байх ёстой" гэж генерал онцолсон байна.


Бройер Польш, Литва, Орос, Беларусийн хил дээрх Сувалкийн коридорыг түрэмгийлэлд өртөх хамгийн эмзэг цэгүүдийн нэг гэж нэрлэжээ. "Балтийн орнууд онцгой эмзэг байдаг. Тэнд байхдаа би үүнийг мэдэрдэг. Эстоничууд өөрсдийн нөхцөл байдлыг аль хэдийн халууныг мэдэрч, галыг харж, утаагаар амьсгалсан хүнтэй харьцуулдаг. Германд бид зөвхөн тэнгэрийн хаяанд байгаа бүдэгхэн утааг л хардаг" гэж тэр нэмж хэлсэн байна.


Мөн Орос Украины дайныг НАТО-той хийж буй томоохон мөргөлдөөний нэг хэсэг гэж үзэж, эвслийн хамгаалалтын шугамыг идэвхтэй туршиж байгааг генерал тэмдэглэжээ. 


Ийм үйлдлийн жишээ болгон тэрбээр Балтийн тэнгис дэх усан доорхи кабель шугамд хийсэн халдлага, нийтийн тээвэрт хийсэн кибер халдлага, Германы чухал дэд бүтцийн ойролцоо дрон ашиглах зэрэг үйлдлүүдийг дурьдсан байна. Бройер НАТО-гийн холбоотнуудад хандан батлан хамгаалах хүчин чадлаа яаралтай нэмэгдүүлэхийг уриалсан бөгөөд мөн "Бид одоо өөрсдийгөө үр дүнтэй хамгаалах, урьдчилан сэргийлэх чадавхийг бэхжүүлэхийн тулд илүү их нөөц, хүчин чармайлт гарган ажиллах ёстой" гэжээ.



Ж.Бат 

Эх сурвалж: antikor.com.ua