sonin.mn
Сэтгэгдэл (33)

Аваргуудын лигийн тэмцээний хагас шигшээгийн эхний тоглолтод Испанийн “Барселона” баг өөрийн талбайд Италийн “Интер” багтай 3:3 харьцаагаар тэнцлээ. “Интер”-ийн довтлогч Маркус Тюрам эхний минутанд гоол оруулсан бол Дензел Думфрис /21, 64/ дубль хийжээ. Барсачуудаас Ламин Ямал /24/, Ферран Торрес /38/ нар гоол оруулсан бол 65 дахь минутанд “Барселона”-гийн тоглогч Рафиньягийн цохисон бөмбөг “Интер”-ийн хаалганы шонг онож, улмаар хаалгач Ян Зоммерын нуруунаас ойж автогоол орсон байна.


Тюрам тоглолтын 30 дахь секундэд гоол оруулсан нь Аваргуудын лигийн түүхэнд хагас шигшээгийн тоглолтод хамгийн хурдан орсон гоол боллоо.


Түүнчлэн Ямал “Барселона”-гийн бүрэлдэхүүнд 100 дахь тоглолтоо хийхдээ Аваргуудын лигийн тэмцээний хагас шигшээ тоглолтод гоол оруулсан хамгийн залуу тоглогч /17 жил 291 хоног/ болж, Килиан Мбаппегийн тогтоосон амжилтаас /18 жил 140 хоног/ давжээ. “Интер” багийн ахлах дасгалжуулагч Симоне Инзаги хэлэхдээ “Л.Ямал бол хөл бөмбөгийн түүхэнд 50 жилд нэг удаа гарч ирэх авьяаслаг тоглогч” гэж тодорхойлсон байна. Хоёр багийн дараагийн тоглолт тавдугаар сарын 6-нд Милан хотноо болно. 




Б.Адъяахүү