sonin.mn
Сэтгэгдэл (19)

О.Сэргэлэн ахлагчтай Элэг шилжүүлэн суулгах багаас тархины үхэлтэй донороос эрхтэн шилжүүлэн суулгах эмчилгээний нөхцөл байдлын талаар мэдээлэл хийлээ. 


Энэ үеэрээ тэд: "Бид П.Батчулуун эмчийнхээ хүүхдүүдээс түүний биеийн байдлынх нь талаар мэдээлэл өгч болох уу гэдэг зөвшөөрөл авсан. Өнөөдөр П.Батчулуун эмчийн биеийн байдал тун муу байгаа. Бид нар өөрсдөө эмч хүмүүс учраас энэ хүний талаар санаа зовоод энэ мэдээллийг хийж байна. Эмч хүн гэдэг чинь ялгаа байхгүй зүрх нь цохилдог, сэтгэл нь хөдөлдөг жирийн хүн. П.Батчулуун эмчийн маань сэтгэл санаа өнөөдөр маш хүнд байгаа. Хоёрдугаарт энэ асуудал дэгдэхээс өмнө ерөнхийдөө суурь өвчин нэлээд ихтэй зүрхний өвчтэй байсныг та бүхэн сайн мэдэж байгаа байх.


2013 онд П.Батчулуун эмч маань энэ донорын хуулийн хэлэлцүүлэг хийх гээд хуралт зарлачихсан байж байтал гэв гэнэт ухаан алдаж унасан. Тэгээд зүрх нь 16 минут бүрэн зогссон. Яг эмнэлэг дээр байсан тулдаа сэхээн амьдруулах ажиллагаа хийсний үндсэн дээр зүрх нь эргэж ажилласан. 


Тэгээд зүрх нь зогссонтой холбоотойгоор нийтдээ үүнээс хойш таван удаа зүрхийг тэжээдэг зүрхний гол титэм судсандаа тэлэгч тавиулсан. Сая шүүхийн шийдвэр гарсны дараа дахиад нэг судас нь бөглөрөөд дахиад нэмж нэг тэлэгч тавиулсан. Дээр нь чихрийн шижин өвчтэй мөн бас яг өнөөдрийн байдлаар зүрхнийх нь үйл ажиллагаа нь 33 хувьтай байгаа. Ер нь хэзээ ч зүрх нь зогсох магадлал өндөр байгаа. Бид бол хууль мэдэхгүй эмч хүмүүс. Ерөнхийдөө П.Батчулуун эмчийн маань биеийн байдал ийм хүнд байгаа учраас цаашдаа энэ их айхтар сэтгэл санааны дарамтыг давж гарч чадахгүй гэж бид үзэж байна. Тийм учраас энэ хүний эрүүл мэндийн байдлыг харгалзан үзээд П.Батчулуун эмчийг төр засгаас өршөөж өгөөсэй гэж хүсч байна.  


Ер нь бол бид нар П.Батчулуун эмчийг гэмт хэрэг хийсэн гэж үнэхээр бодохгүй байгаа. Эрхтэн шилжүүлэн суулгах хуудас гэж таниулсан зөвшөөрлийн хуудас байдаг. Энэ хуудсаар дамжуулж эрхтэн шилжүүлэн суулгах төвийнхөн маань зөвшөөрөл авдаг. 


Тэр хүн нь тэнгэрт халих гээд эргэж амьдрах боломжгүй боллоо гэдэг мэдээллийг хүлээн авсан ар гэр, ах дүү хамаатан садан сэтгэл санааны хувьд ямар хүнд байх нь ойлгомжтой. Яг тэр үед нь нүүр тулж очиж уулзаж танай хүн нэгэнт тэнгэрт хальж байгаа учраас бусад хүмүүст буян болооч ээ гэж гуйдаг энэ хэцүү албыг гүйцэтгэдэг хүмүүс бол манай эрхтэн шилжүүлэн суулгах албаны хүмүүс байдаг. П.Батчулуун эмч маань яг л энэ үүргийг гүйцэтгэж, энэ байгууллагыг анх байгуулагдсан цагаас нь эхлэн 7 жил ажилласан. Тэгээд тийм хүнд нөхцөлд тэр хүмүүс дээр очоод энэ асуултыг асууж гуйна гэдэг бол маш хэцүү зүйл. Тэр таниулсан зөвшөөрлийн хуудас нь тэр хавтас хэрэгт нь байгаа байх. Тэгээд энэ батлагдсан журмын дагуу л энэ үйл ажиллагаа явагдсан. Тэрнээс биш манай багийнхан очоод танай хүнийг донор болгоё гэж хэлэх эрх угаасаа хуулиараа хориотой байдаг. Тийм учраас П.Батчулуун эмч энэ журмынхаа дагуу л энэ үүргийг гүйцэтгэсэн” гэв. 


Ж.Бат