sonin.mn
Сэтгэгдэл (10)

Ноорог.мн сайтад хойшлуулшгүй ажиллагаа явуулж, зарим эд зүйлсийг нь хураан авсан талаар бид өмнө нь мэдээлсэн. Тэгвэл энэ асуудалтай холбогдуулан өнөөдөр УИХ-ын гишүүн С.Цэнгүүн байр сууриа илэрхийллээ. Тэрбээр "Ер нь бид нар эрх чөлөөтэй гэж яриад байгаа боловч хязгаарлагдмал байдалтай болчихоод байна. Эндээс харахаар Монгол улсад хэвлэлийн эрх чөлөө байхгүй болсон нь жил жилийн индексүүдээр харагдаж байгаа. Тэр үүднээсээ хэдхэн хоногийн өмнө манай улсыг автократ дэглэмтэй улсын тоонд багтаасан байсан. Үүнээс үзэхэд хууль үнэхээр хэнд үйлчлээд хэнд үйлчлэхгүй байгаа юм бэ гэдэг асуудал яригдах шаардлага гарч ирж байна. 


Нэг шөнийн дотор Ноорогийн залуучуудыг барьж байгаа бол дараа нь хэн байх вэ гэдэг асуудал яригдана. Өнөөдөр өөрийнхөө үзэл бодлыг илэрхийлээд өөрийнхөөрөө байхыг тэмүүлж байгаа хүмүүс айдаст автаж байна. 


Миний үзэж байгаагаар өнөөдөр бид нар маш буруу жишгийг тогтоож байна. Одоо ямар нэгэн кейс болоод гараад ирэхэд Ноорогийн залуучуудыг харлуулах ч гэдэг юмуу ямар нэгэн юмтай холбох гээд оролдоод л явах байх. Бид нар ийм зүйлийг хоёр хоног хэлэлцүүлэг болгож байгаад гурав дахь хоногоос мартдаг. Ийм байдлаар бид нар хуйсарч яваад байгаа нь үнэхээр харамсалтай байна. Миний хувьд энэ асуудлаар УИХ-ын гишүүний хувиар албан бичиг явуулсан. Тэгээд энэ Эрүүгийн хуулийн 19.9 дүгээр зүйлд зааснаар Үндэсний эв нэгдлийг бусниулах гэмт хэрэгт сэжиглэгдэж байгаа гэдэг нь үнэхээр итгэмээргүй санагдаж байна. Миний хувьд энэ асуудлын талаар холбогдох албан тушаалтнуудаас мэдээлэл авахаар ажиллаж байна. Мөн цаашид дахин ийм дураараа баривчилдаг явдлыг гаргуулахгүй байх талаар чадах бүхнээ хийнэ” гэв. 


Ж.Бат