sonin.mn
Сэтгэгдэл (4)

Олон улсын Эрүүгийн шүүхийн /ОУЭШ/ Ерөнхий прокурор Карим Хан исламын радикал үзэлтнүүдийн Талибан хөдөлгөөний удирдагч Хайбатулла Ахунзада, Афганистаны Дээд шүүхийн дарга Абдул Хаким Хаккани нарыг баривчлах зөвшөөрөл олгох хүсэлт гаргажээ.


“Эдгээр хоёр хүн бусдыг хүйсийн байдлаар мөрдөн мөшгиж, хүмүүнлэг ёсны эсрэг гэмт хэрэг үйлдсэн байж болзошгүй хэмээн сэжиглэх ноцтой үндэслэлүүд бий” хэмээн пүрэв гарагт ирүүлсэн прокурорын хүсэлтэд дурдсан байна. 


Афганистаны эмэгтэйчүүд, охидууд болон ЛГБТ бэлгийн цөөнхийнхөн талибуудын зүгээс үйлдэж буй урьд хожид үзэгдээгүй харгис хэрцгий хүчирхийлэлд байнга өртөж байгааг прокурор онцолжээ. ОУЭШ-д ирсэн мэдээллүүд нь тус улсын эмэгтэйчүүд, охидын нөхцөл байдал тэсвэрлэхийн аргагүй хүнд болсныг гэрчилж байна. Тэдний шилжин суурьших, боловсрол эзэмших эрх, хувийн ба гэр бүлийн халдашгүй байдлыг нь байнга зөрчиж байна.


Талибуудын үйлдлийг эсэргүүцсэн хүмүүсийн амь насыг хөнөөж, шоронд хорьж, эрүүдэн тамлаж, тэдэнд бэлгийн хүчирхийлэл дарамт үзүүлж байна. Ийм хүчирхийллүүд Афганистаны нийт нутаг дэвсгэрт 2021 оны 8 дугаар сарын 15-наас хойш өнөөдрийг хүртэл үйлдэгдсээр байна гэж ОУЭШ-ийн Ерөнхий прокурор мэдэгджээ.


Одоо ОУЭШ-ийн шүүгчид хүсэлтийг хэлэлцэх бөгөөд энэ үйл явц хэдэн долоо хоног, хэдэн сарын турш үргэлжилж магадгүй. Баривчлах зөвшөөрөл олгосон тохиолдолд Ромын дүрмийг баталсан 125 улсын эрх баригчид улсынх нь нутаг дэвсгэрт байгаа гэмт этгээдүүдийг баривчлах үүрэгтэй юм.  




Б.Адъяахүү