sonin.mn
Сэтгэгдэл (14)

Хэвлэл мэдээллийн зарим хэрэгсэл болон сошиал хаягуудаас "Гашуунсухайтын төмөр замын хил холболтыг Энержи Ресурс компани гацаан эсэргүүцэж, Засгийн газрыг огцруулахаар оролдож байна", "Тавантолгойг 100 хувь 100 жилээр авч, Хятадад өгөх гэж байсан" гэх мэт илт гүтгэлгийн шинжтэй, ор үндэслэлгүй мэдээлэл тарааж байгааг манай компани эсэргүүцэж, энэ худал мэдээллээ татан авч залруулга хийхийг шаардаж байна.


Манай улсын экспорт, төсвийн орлого тэлэх, нүүрс тээврийн зардал буурах эдийн засгийн чухал ач холбогдолтой, олон жил хүлээгдсэн төслийг хэрэгжүүлэхээр ажиллаж буй Засгийн газрын бодлого, шийдвэрийг Энержи Ресурс компани бүрэн дэмжиж байгаа болно.


Бидний хувьд гадна, дотны ямарваа нэгэн улстөрч, компанитай үгсэн хуйвалдаж, Тавантолгой ордыг авах, өгөх яриа хэлцэл, оролдлого хийж байсан удаагүй. Гагцхүү УИХ-ын тогтоолын дагуу, Монгол Улсын Засгийн газраас 11 жилийн өмнө зарласан олон улсын тендерт санал хүргүүлж байсныг хариуцлагатайгаар мэдэгдэж байна.


Манай компани 2008 оноос Ухаа худаг уурхайн цогцолборыг олон улсын жишигт нийцүүлэн хөгжүүлж, нүүрс баяжуулах үйлдвэр, ус хангамжийн систем, цахилгаан станц, нийгмийн дад бүтцийг бүтээн байгуулсан. Монгол нүүрсний өрсөлдөх чадварыг дээшлүүлэх, байгалийн баялгийг сорчлолгүй, бүрэн ашиглах зорилгоор 2,500 гаруй Монголчуудыг эгнээндээ багтаасан манай хамт олон зөвхөн баяжуулсан нүүрс экспортолдог бөгөөд олон жилийн турш Монгол Улсын хувийн хэвшлийн хамгийн том татвар төлөгч байж, улс орон нутгийн төсөв бүрдүүлэх, экспортын орлого нэмэгдүүлэхэд чухал хувь нэмэр оруулж ирсэн. Бид цаашид ч Монгол Улсын хууль тогтоомжийг чандлан мөрдөж, олсон амжилтаа ахиулан ажиллах бөгөөд улс төрийн элдэв бохир ажиллагаандаа татан оролцуулах гэсэн аливаа үйлдэл, оролдлогуудаас ангид байх болно.


ЭНЕРЖИ РЕСУРС ХХК