Баасан - 11 сарын 08,
2024
ВАШИНГТОН, 2024 оны арваннэгдүгээр сарын 8 /Reuters/. Пүрэв гарагт АНУ-ын Төв банкны үүргийг гүйцэтгэдэг Холбооны нөөцийн сан /ХНС/ бодлогын хүүгээ дахин 25 суурь нэгжээр бууруулжээ.
“Бодлогын хүүг ойр ойрхон бууруулах нь инфляцтай холбоотой ахиц дэвшилд саад учруулж болзошгүйг бид мэдэж байгаа. Үүний зэрэгцээ бодлогын хүүг бууруулахгүйгээр хэт удаан барих нь эдийн засгийн идэвхжлийг сулруулж болзошгүй” гэж ХНС-гийн дарга Жером Пауэлл мэдэгдсэн байна.
Бодлого боловсруулагчид бодлогын хүүг сүүлийн хэдэн арван жилд байгаагүй түвшинд хадгалах замаар инфляцыг бууруулахыг зорьж байгаа юм. Есдүгээр сард тэд хүүг 50 суурь нэгжээр бууруулсан нь сүүлийн дөрвөн жил хагасын хугацаанд анх удаа бууруулсан тохиолдол болсон билээ.
АНУ-ын ерөнхийлөгчийн сонгуульд Дональд Трамп ялснаас хойш нэг өдрийн дараа дээрх мэдэгдлийг хийжээ. Д.Трамп өмнө нь ерөнхийлөгчөөр ажиллаж байхдаа бодлого боловсруулагчидтай амаргүй харилцаатай байсан юм. Тэрбээр хүүгээ бууруулахыг шаардаж, Ж.Пауэллийг огцруулахыг хүртэл уриалж байсан удаатай.
ХНС нь бусад төв банкуудын нэгэн адил улс төрийн хөндлөнгийн оролцоогүйгээр мөнгөний бодлогын талаар шийдвэр гаргах зорилготой бие даасан засгийн газрын агентлаг юм. Бодлого боловсруулагчид энэ удаад дээр дурдсантай ижил дарамттай тулгарах эсэх нь анхаара татаж байна. Харин Ж.Пауэлл мэдэгдэхдээ, ойрын хугацаанд сонгуулийн дүн манай бодлогын шийдвэрт ямар ч нөлөө үзүүлэхгүй гэжээ.
Э.Хулан
Эх сурвалж: "Монцамэ" агентлаг
Сэтгэгдэл2
Америк сөнөх зам руугаа орлоо. Манай Путин ах тэр хүүг чинь нэмээд байгаа. Тэгэхээр нэмсэн нь зөв биздаа
Ардчилсан нам өнгөрсөн дөрвөн жилд холбооны нөөцийн сангаас найман триллион доллар зээлж, энэ мөнгөний ихэнх хувийг вакцин үйлдвэрлэл, украины дайн, дүрвэгсэд, хүмүүнлэгийн тусламжид зарцуулж, тэрбумтангууд корпорацийн эзэд хуваан авч, америкийн ард түмэнд хүртээлгүй өр болж үлдсэн болохоор америкчууд ардчилсан намд дургүйцэж Трампыг сонгосон юм.