sonin.mn
Сэтгэгдэл (2)

СИНГАПУР, 2026 оны дөрөвдүгээр сарын 20 /Reuters/. Өнгөрсөн бямба гарагт Ормузын хоолойгоор 20 гаруй хөлөг онгоц дамжин өнгөрсөн нь гуравдугаар сарын 1-нээс хойших нэг өдрийн хамгийн өндөр үзүүлэлт болсон тухай далайн тээврийн шинжилгээний “Kpler” компани мэдээлжээ. 





Бямба гарагт тус хоолойгоор нэвтэрч чадсан хөлөг онгоцнуудын тав нь Иранаас газрын тосны бүтээгдэхүүн, металл ачсан хөлөг онгоцууд байжээ. Тэдгээрийн гурав нь шингэрүүлсэн нефтийн хий (LPG) тээвэрлэгч бөгөөд Хятад, Энэтхэгийг чиглэн явж байгаа аж.





Мөн Арабын Нэгдсэн Эмирт Улсаас (АНЭУ) шингэрүүлсэн нефтийн хий ачсан Панамын далбаатай “Crave” танкер Индонезыг чиглэж явж байгаа бол Бахрейнаас газрын тосны бүтээгдэхүүн ачсан гурван танкерын хоёр нь болох “Akti A”, “Athina” хөлөг онгоцнууд Мозамбик, Тайланд руу тус тус замдаа гарчээ. Түүнчлэн Либерийн далбаатай “Navig8 Macallister” танкер АНЭУ-ын 500 мянга орчим баррель нафтаг Өмнөд Солонгосын Улсан хот руу, Либерийн далбаатай, түүхий тос тээвэрлэгч “Fpmc C Lord” хөлөг онгоц Саудын Арабын хоёр сая орчим баррель нефтийг Тайванийн Майляо боомт руу, Энэтхэгийн далбаатай “Desh Garima” хөлөг онгоц АНЭУ-ын “Das” маркийн 780 мянган баррель нефтийг Шри-Ланка руу тээвэрлэж байгаа аж.





Бямба гарагт мөн Катарын бордоо ачсан “Ruby” хөлөг онгоц, Саудын Арабаас нефтийн кокс ачсан “Merry M” ачааны хөлөг онгоц Ормузын хоолойгоор нэвтэрчээ. 


Г.Энх-Од


Эх сурвалж: "Монцамэ" агентлаг