sonin.mn
Сэтгэгдэл (64)

Украин дахь Оросын цэргийн тусгай ажиллагаа 727 дахь хоног дээрээ ирж байгаатай холбогдуулан мэдээллийн тэнцвэртэй байдал хангах үүднээс америкийн Voice of Americanews.com сайтын эх сурвалжаас түүвэрлэн орчуулж сонирхуулъя. Энд sonin.mn сайтын байр суурь тусгагдаагүй болно.


Украины эсрэг түрэмгийллийнх нь зорилго зорилт бүдгэрсэн, дээр нь фронт дахь ялагдал, мөн өдөр бүр үйлддэг оросын цэргийн гэмт хэрэг, энэ бүхний хариуцлага хэн дээр буух вэ гэсэн сэдэв цахим ертөнцөөр дүүрэн. Иргэдээ барьцаалсан нэгэн дээрэмчин хөршөө террорчлож, тэгснийх нь төлөө барьцаанд байгаа ард иргэд нь гэмт хэргийнх нь хамсаатан болох ёсгүй гэсэн байр суурь түгээмэл.


Дайн өдөр алгасахгүй үргэлжилнэ. Оросын хохирол ямагт давна. Авдеевкад ялав гээд оросын суртал нэвтрүүлэг шуугина. Гэтэл оросын өөрийнх нь цэргийн мэргэжилтнүүд нууцаа задлав. Эр зоригоороо тулалдаад украины цэргийг ухраасан бус, өдөр шөнөгүй хэдэн зуун фугасын бөмбөг хаясаар байгаад ухраасан гэв. Авдеевкийн төлөө тулалдаанд Оросын армийн хүлээж буй хохирол украиныхаас 13 дахин их (2024 он гараад алагдсан орос цэрэг 20.5 мянга), зөвхөн танк гэхэд 222-ыг сөнөөлгөсөн ба Авдеевкийн гарнизон оросын цэргийг хядаж өгөөд хотыг түр орхин гарсныг цэргийн шинжээчид тэмдэглэж байна. Орос цэрэг гэр рүүгээ бичжээ: Эргэн тойрон цогцос. Бүгд манай цэргүүд. Энд дайн гэхээсээ мах хэрчдэг машин л ажиллаж байна. Ёстой аймшиг!


Voice of Americanews.com сайтад оросын суртал нэвтрүүлгийн машины үнэн төрхийг илчилсэн томхон нийтлэл тавигджээ. Хоёр жилийн дайны явцад оросын суртал нэвтрүүлэг хоёр үе шаттайгаар өрнөжээ. “2022-02-24” гэсэн эхлэлтэй эхний шатанд “Бидэнд бүү саад бол. Бид хийдгээ хийнэ. Бидний зөв” гэсэн агуулгатайгаар нэг жилийг ухуулан таниулж үджээ. “2023-02-23”-наас “Бүх ард түмнээрээ Эх орноо хамгаална” гэсэн агуулгаар (дайнд бүх ард түмнээ дайчлан, түлхэн оруулах) суртал ухуулга явагдаж, тархи угааж байна. ОХУ-ын армийн үйлдэж буй цэргийн гэмт хэрэг, амсаж буй асар их хохирол, бүтэлгүйтэл, Украины эсрэг довтолсны цаад зорилго нь логикоо алдсан, энэ бүхнийг Кремлийн пропаганд нь мэдээллийн фронтод аргалсаар, ятгасаар, хуурсаар өнөө хүрчээ. Геноцид үйлдэх үндсэн нөхцөл шалтгаанаа маш сайн онилон дайрсаар байна.


Тэгэхдээ оросын ТВ үзэгчдээр үзэн ядуулах зорилгодоо яаж ийгээд хүрсэн бололтой юм. Украинчуудыг бүхэлд нь үзэн ядуулна, украинчуудын төрх байдлыг нацист болгож харуулна, Украин улс өөрөө тэг чигтээ нацист фашист төрхтэй болсон, дампуурч байгаа улс, хуурамч хиймэл улс, Украин оршин байх эрхгүй, иймд Украиныг цэгцлэх дуусгах хэрэгтэй хэмээн ятгасаар байна. 


Дайнд ялна гэсэн цэргийн пропаганд нь оросын дотоод руу чиглэхдээ зөвхөн зөвтгөлөөр дүүрнэ. Орос Украин руу дайраагүй, зөвхөн Донбассын ард түмнийг хамгаалсан, яагаад гэвэл Украин нь өөрөө Донбасс руу түрэмгийлэхээр зэхэж байсан, АНУ, НАТО хоёр үүнийг өдөөсөн. Энэ схемээр бол украинчууд хүн биш, тоглоомон зэвсэг. Тэдний савраас чөлөөлнө, эзэлж авсан нутаг дэвсгэрээ чөлөөлөлт гэж ойлгуулна. Хэрэв Орос энэ дайнд ялагдах аваас бүгд хамтдаа ялагдах ёстой. Иймээс бүгдээрээ хамт ялах ёстой. Энэ утгаар яг л Гитлерийн пропаганд Оросын ТВ-ээр өдөр бүр явж байна. “Хамтдаа ялахгүй бол хамтдаа ялагдана”–оросын ард түмэнд ингэж тулгана.


“Ариун дайн”–Оросын үнэт зүйлийн төлөө, Орос орон оршин тогтнохын төлөө одоо дайтаж байна. Орос ялагдаагүй байна. Херсоныг орхиж гарсан, Харьков мужаас шахагдан гарсан, Киевийн ойролцоо, Змеиный арлаас хөөгдсөн нь ялагдал биш, юу ч биш хэмээн сурталдах боловч дараа дараалан ялагдал хүлээснээ зөвтгөх аргумент олж чадахгүй. Одоо хийж байгаа дайнаа зөвтгөх цорын ганц шалтаг нь украины энгийн номхон ард иргэд Орост бууж өгөх нэгдсэн санаа зоригтой болох ёстой ба түүний төлөө украины хотуудыг хайр найргүй бөмбөгдөж дэлбэлэхээс өөр аргагүй. Орос дахь тэдний ахан дүүс Украин дахь хамаатнуудынхаа зовлон бэрхшээлийг сонсох үзэх боломжгүй болсон, үздэг сонсдог ганц суваг Оросын ТВ, радио. Зөвлөлтийн тусгай албадын хяналтад байсан шиг зөвлөлтийн пропаганд яг хэвээрээ үргэлжилж байна. Агуулга нь “Орос бол чөлөөлөгч. Орос бол аугаа их эх орон. Харин Украин бол нацистууд, националистууд”. Ертөнцийг үзэх оросуудын үзэл, чиг хараа нь ердөө энэ. Өөрөөр бол бусдыг бүгдийг нулимна, үгүйсгэнэ. Оросын армийн үйлдэж байгаа цэргийн гэмт хэргийг оросууд олж харах хэд хэдэн өнцөг бий. Эхнийх нь үйлдсэн гэмт хэрэг болгоноо үгүйсгэх няцаах, ерөөсөө тийм зүйл огт болоогүй, домог зохиож гүтгэж байна гэж мэлзэх. Хичнээн их бөмбөгдөж, их буугаар галлаж, атаклаж, давших тусам түүнийгээ “Вторая Буча” болгон хариу мэлзэх.


Бучагийн яргалал гэдгийг укрнацистууд өөрсдөө зохиомжилсон болгож Орост мэлзсээр байна. Хоёр дахь өнцөг нь оросын цэргийн гэмт хэргийн тухай ярих мөртлөө украинчууд яг тийм гэмт хэрэг үйлдэж байгаагаа ярихгүй байна гэж барьцах. “Украинчууд бас л хийдэг шүү дээ”–Донецкийн энгийн хүн амыг, чөлөөлөгдсөн нутгийн энгийн хүн амыг их буугаар галлаж, алж талж байна, тэд чинь! Бас нэгэн өнцөг (3) байна. Үхэл аллагаа мандуулах, үхэх нь буруу биш гэх суртал ухуулга. “Энх тайвны төлөө аллага”, “Барууныхан Оросыг үзэн яддаг, Оросын оршин тогтнолыг устгахыг хүсдэг тул бид алж устгахаас өөр арга алга”. Барууныхан Оросын эсрэг цөмийн ба  биологийн зэвсэг хэрэглэхээс ч буцахгүй. Тэгвэл бид энх тайвны төлөө, хэвийн тайван хөгжихийн төлөө тэмцэж, өөрийгөө Украинд хамгаалж байна. Иймд ямар ч үнээр хамаагүй ялалт байгуулах нь чухал. Яг ийм суртлын үед улаан цагаандаа гарсан ухуулга хийгдэнэ. “Ялахаас өөр сонголт бидэнд алга, учир нь тэд биднийг ийм зам руу түлхсэн, хэрэв ялахгүй бол Орос өөрөө сөнөнө” хэмээх ятгалга. Оросын ердийн үнэт зүйл бол “Зөвхөн эх орон оршин үлдэхийн төлөөх дайн”. Бид юу өдөөсөн, юу үйлдсэн нь чухал биш, үүний төлөө хариуцлага хүлээхгүй, хариуцлага хүлээхгүйн төлөө ялах л хэрэгтэй.


Дөрөв дэх өнцөг. Орос орны хөгжил цэцэглэл, эдийн засгийн өсөлтийн төлөө, олигархиудын 30 жилийн дээрмийн эсрэг бид Украинд байлдаж байна. Энэ дайнд ялах нь Оросын дотоодын асуудал бэрхшээлийг шийдвэрлэх гол арга зам мөн. “Вечер с Владимиром Соловьевым” гэх ТВ-ийн ток-шоу ярилцлагад экс-тагнуулч Андрей Безруков яг тэгж ярьжээ. Дайны өмнө Оросын эдийн засаг зогсонги байсан ба 30 жил эх орноо тонож, хамаг мөнгөө гадаадад гаргаж, улс орны эдийн засгийг уналтад оруулаад байсныг Украинд өдүүлсэн дайн нь хазаарлан барьсан гэж ярьжээ. Нэг үгээр бол Кремлийн пропагандистууд шууд хэлж уриалж байна: Дайн бол оросуудад ашигтай, хэрэв дайн хийгээгүй бол дотоодын зовлонгоосоо босч ирэхгүй байсан. Хөгжил дэвшил хангагдахгүй өнгөрөх байсан.


Тав дахь өнцөг. Энэ дайн нийгмээ цэвэрлэхэд маш хэрэгтэй гэх суртал. Урвагчид, авилгачдаасаа нийгэм салж байна. Орос орон дайны явцад өөрийгөө жинхэнээсээ олж авлаа. Нутаг дэвсгэрээ тэлээд оросуудын сайн сайхан аж төрөх үе ирлээ. Мянган жилийн өмнө өвөг дээдэс маань тэгээд гэрээсэлчихсэн. Путины өнгөн дээр гэрээслэл нь биеллээ. Оросууд нутагтаа хэвийн тайван амьдарч, аз жаргалаа эдэлж байхын оронд өвөг дээдсийнхээ гэрээслэлийг биелүүлэн бусдын газар нутгийг булаан авах аянд мордох хэрэгтэй. Иймийн тулд сул дорой байлгахгүйгээр нийгэмд түгшүүртэй байдлыг дэвэргэе хэмээн Владимир Соловьев уриална. Дайнгүй хэвийн аж төрөх нь оросуудыг сул дорой болгодог тул байнгын үргэлжилсэн дайны байдалд оросуудыг байлгах нь бүрэн эрхт байдлынх нь шалгуур гэв. (Үргэлжлэлийг дараагийн хөрвүүлэгт) 


англи хэлнээс хөрвүүлсэн Дүгэржавын Номиндарь