sonin.mn
Сэтгэгдэл (8)

Герман улс Оростой үүсч болзошгүй мөргөлдөөнд зориулж нисгэгчгүй нисэх төхөөрөмжийн томоохон нөөц бүрдүүлэх бодолгүй байгаа тухай ХБНГУ-ын Батлан хамгаалахын сайд Борис Писториус Frankfurter Allgemeine Zeitung-д өгсөн ярилцлагадаа мэдэгдлээ. Түүний тайлбарласнаар, дроны технологи асар богино хугацаанд шинэчлэгддэг болсон нь нөөц үүсгэх шаардлаггүй болгож байгаа гэнэ.


Писториус хэлэхдээ, дронуудын инновацийн мөчлөг “хоёр гурван сарын дотор” өөрчлөгдөж, хамгаалалтын болон хэрэглээний шинэ шийдлүүд маш хурдтай гарч байна.

“Ийм нөхцөлд өнөөдөр хэдэн тэрбум еврогийн дрон нөөцлөх нь утгагүй. Тэд маргааш гэхэд л хуучирчихна” гэж тэрээр онцоллоо.

Германы зорилго бол агуулахад дрон хадгалах бус, шаардлагатай үед шууд өндөр хүчин чадлаар үйлдвэрлэл эхлүүлэх чадвартай батлан хамгаалах салбарын экосистемийг бүрдүүлэх явдал гэнэ. Үүний хүрээнд тус улсын Засгийн газар, хувийн үйлдвэрлэлийн компаниудтай хамтран хямралын үед орчин үеийн зэвсгийг богино хугацаанд их хэмжээгээр үйлдвэрлэх тогтолцоог бий болгож байна.

Писториус мөн дронууд уламжлалт зэвсэгт техникийг хална гэсэн ойлголтыг няцаав.

“Ирээдүйн дайн бол бүх төрлийн зэвсэглэл хослон ашиглагдах холимог дайн байх болно — гаубиц, танк, онгоц, кибер орон зай, мөн мэдээж дронууд” хэмээн тэр хэлжээ.


Н.Отгончимэг


Эх сурвалж: minval.az