sonin.mn
Сэтгэгдэл (22)

Монгол Ардын намын Удирдах зөвлөлийн өргөтгөсөн хуралдаан өчигдөр Тусгаар тогтнолын ордонд боллоо.


Хурлын үр дүнгийн талаар МАН-ын Ерөнхий Нарийн Бичгийн дарга Я.Содбаатар мэдээлэл хийхдээ: “Намын дотоод улс төрийн нөхцөл байдалтай уялдуулан Ажлын хэсэг байгууллаа.


Ажлын хэсгийг Удирдах зөвлөлийн гишүүн Ч.Хүрэлбаатар ахалж, намын Нарийн бичгийн дарга Н.Энхбаатар Ажлын хэсгийн нарийн бичгийн даргаар ажиллах бөгөөд 16 хүний бүрэлдэхүүнтэй байна.


Энэ аравдугаар сарын 30-ныг хүртэл Ажлын хэсгийн бүрэлдэхүүн намын эв нэгдлийг бэхжүүлэх чиглэлээр санал дүгнэлт боловсруулан, холбогдох бүх талуудтай уулзалт хэлэлцээр зохион байгуулж, үр дүнг танилцуулна." гэв. Уг эвлэрүүлэх ажлын хэсэг гэгчид нь УИХ-ын гишүүн, Засгийн Газрын гишүүн асан Ч.Хүрэлбаатар, Ерөнхий Сайд асан С.Баяр, Ерөнхийлөгч асан Н.Энхбаяр, Ерөнхий Сайд, УИХ-ын дарга асан М.Энхболд, УИХ-ын дарга асан Ц.Нямдорж, МАХН-ын ЕНБДарга асан Б.Даш-Ёндон, УИХ-ын гишүүн З.Мэндсайхан, Тэргүүн Шадар Сайд, УИХ-ын гишүүн Н.Учрал, УИХ-ын гишүүн Ж.Бат-Эрдэнэ, Нийслэлийн Засаг дарга Х.Нямбаатар, Шадар сайд, УИХ-ын гишүүн С.Амарсайхан, Ерөнхий Сайд асан Ж.Эрдэнэбат, МАН-ын НБДарга Н.Энхбаатар, УИХ-ын гишүүн асан Д.Тогтохсүрэн нар багтсан байна.


Энэхүү ажлын хэсгийн зорилго нь МАН-ын талцаад буй хоёр талыг эвлэрүүлэх юм гэнэ. Энэ зөрчил анх МАН-ын даргын төлөөх өрсөлдөөнөөс эхэлсэн байж болно.


Гэвч энэ явцад Монгол Улсын Үндсэн хуулийг зөрчсөн байж болзошгүй, эрүүгийн онц ноцтой гэмт хэрэг үйлдсэн байж болзошгүй зэрэг маш олон илт хууль бус үйлдлийн тухай баримтууд дэлгэгдсэн юм. Гэтэл энэ бүхнийг мухарлаж, хуулийн хүрээнд эцэслэн шийдвэрлэхгүйгээр зүгээр л гудамжны дээрмийн бүлэглэл шиг ярилцаж, тохиролцоод нэгнийгээ уучлаад, дээрэм хийх бүсээ хуваагаад сална гэвэл уучлаарай. Нэгмөсөн МАН тарсан нь дээр болно шүү. Мафийн бүлэглэл хоорондын зөрчлийг хуучны дээрэмчин нь зуучилдаг шиг гэмт хэрэг үйлдсэн нь Монгол Улсын шүүхээр тогтоогдсон С.Баяр хамгийн идэвхтэй зуучлагч нь ч болчихсон явж байх шиг.Дахин хэлэхэд МАН-ынхан гудамжны дээрэмчид шиг тохиролцоод л болоо гэж бодож байвал эсрэгээрээ жинхэнэ ард түмний тэмцлийг өдөөж мэднэ шүү.


Б.Намуун