sonin.mn
Сэтгэгдэл (54)

 Улс төрийн хүрээнд болж буй улс төрийн үйл явдлын талаар академич, Монгол Улсын анхны Их Хурлын гишүүн С.НАРАНГЭРЭЛЭЭС тодруулга авав. 


-Өнөөгийн улс төрийн нөхцөл байдлыг та хэрхэн үнэлж байна вэ? 


-Хэрэв бид улс орноо энгүй далайд хөвж яваа хөлөг онгоцтой зүйрлүүлбэл, түүний залуур нь яахын аргагүй Монгол Улсын Үндсэн хуулиар Улсын Их Хурал билээ. Гэтэл энэ залуур огцруулалт мэтийн асуудлаас болж гацаж зохих ёсоор хэвийн ажиллахгүй болов.


Эх орон хэмээх хөлөг онгоцонд живэх аюул бодитой нүүрлэлээ.


Гэтэл ард түмнийхээ нэрийн өмнөөс хөлөг онгоцны залуурыг барилцаж байгаа 126 гишүүн энд тэндгүй мэдэгдэл хийж, ярилцлага өгсөн “ганцаарчилсан тоглолт” хийж, өрөөндөө “улс төрийн хов жив” ярьж, цагийг хий хоосон өнгөрүүлж, хөлөг онгоцоо аврах гэж хуруугаа ч хөдөлгөхгүй байгаад сэтгэл үнэхээр зовниж байна.


Даван туулахад тийм ч амаргүй монголын жин хүйтний өвөл асуй. Хугацаанд нь улсын төсөв батлах үүргээ гишүүд умартсан юм биш биз. Улсын төсвийн цаана янз бүрийн асуудалтай монголын ард түмний эрх ашиг бий.


Гишүүдэд эх орон хэмээх хөлөг онгоц живэх эсэхийг ухаарах ухаан одоогоор үнэндээ дутаад байх шиг. Эх орон, ард түмний язгуур эрх ашгийг дээдлэн эрхэмлэхгүй, улс төрийг арилжааны хуулиар зохицуулах гэж оролдоод л. Монголын ард түмний хэнд ч учирч болзошгүй хамтын аюулыг жижгэрч намчирхаж талцаж биш харин хамтаараа сөрөн зогсож, хамтын хүчээр даван туулахаас өөр ямар ч аргагүй гэдгийг сайтар ойлгоосой билээ.  


- Одоо тэгвэл яах ёстой бэ?


-Төрөлх эх орон, ард түмнээ өөрийн бие шигээ, гэр бүл шигээ хайрладаг УИХ-ын гишүүдийн тоо барагдчихаагүй байх гэж би итгэж найдаж байна. Амин хувийн аливаа эрх ашгаа огоорч чадсан гишүүд л энэ мухардлаас гаргана. 

 

- Яаж гаргах гэж?


-УИХ-ын гишүүд хуралдааны танхимдаа хуран цугларцгааж, ирцээ бүрдүүлэн шаардлагатай бол ээлжит бус чуулган зарлаж, гацаж буй асуудлаа тал бүрээс нь ний нуугүй хэлэлцэж, хамгийн зөв шийдлийг олж байж л мухардлаас гарч чадна. Хэрэв ингэж чадахгүй өргөсөн тангаргаасаа няцбал УИХ өөрийн эрхгүй тарах нигууртай. Энэ тохиолдолд эцсийн дүндээ парламентын “дархлаа” үгүй болж ч магадгүй. Олон нийтийн дунд төрийг жолоодох “хатуу гар” хүсэмжлэх уур амьсгалыг газар авахуулж, энэ талын хөдөлгөөн тэмцэл ч өрнөж болзошгүй.  


- Гишүүдээс биш харин хуулиас болж асуудал гацаад байгаа юм биш үү ?


-Хуулийн дээр хүмүүний ёс суртахуун оршдог. Энэ бол шударга ёс, эс шуналтах, эрэмгий зориг, үүрэг ба хариуцлага, бодит үнэн, нэр төр, тэсвэр тэвчээр, эв эе, атгаг бус сэтгэл, эх орон, ард түмнийхээ төлөө гэсэн нэгэн үзүүрт сэтгэл шингэсэн хүчин зүтгэл юм шүү. 


Г.Бямба