sonin.mn
Сэтгэгдэл (26)

Монголын нийгэм, улс төрийн орон зайд эрх мэдэлтнүүдийн ашиг сонирхол давамгайлж, шударга үнэний төлөө дуугардаг хүмүүс улам цөөрч байна. Энэ орон зайд дуу хоолойгоо өргөн, тэмцэж байсан цөөн хүний нэг бол “Алтан Дорнод Монгол” компанийн захирал асан, “Корпорэйт” зочид буудлын сүлжээний үүсгэн байгуулагч Т.Ганболд юм.


Тэр зөвхөн амжилттай бизнесмэн төдийгүй улс төрийн шинэ соёлыг бий болгох зорилгоор улс төрд орж, Монголын хамгийн том нам- Монгол Ардын Намаас сайн дураараа гарч, өөрчлөлтийн төлөө шинэ хүч бүрдүүлэхээр оролдож байсан нэгэн.


Монголын улс төр дэх Д.Дорлигжав тэргүүтний рекет, дээрэм тонуулын схемийг баримттайгаар дэлгэн, "Женко" Х.Баттулга, “Сахал” Д.Эрдэнэбилэг, “Голомт” банкны эзэн Д.Баясгалан зэрэг нөлөө бүхий олигархуудыг нэр заан ил шүүмжилж байсан нь түүнийг эр зоригтой нэгэн гэдгийг нотолдог.


2020 оны УИХ-ын сонгуульд бие даагчдын нэгдсэн хөдөлгөөнийг удирдан нэр дэвшсэнээрээ тэр улс төрийн шинэ жишгийг эхлүүлэх гэж оролдсон. Гэвч сонгуулийн дараа улс төрийн идэвх нь харьцангуй сулран, нийгмийн амьдралд дуу хоолой нь бүдгэрсэн нь харамсалтай. Монголын ардчилалд бизнесийн эрх чөлөө, шударга өрсөлдөөн, эрүүл нийгмийн төлөө тууштай тэмцэгчийн дуу хоолой яг одоо үгүйлэгдэж байна.


Өнөөдөр олон нийт улс төрчдийн хоосон амлалт, эрх мэдэл–бизнесийн бүлэглэлийн явцуу системээс залхаж, шударга үнэний төлөө хэн дуугарах бол? санааширч байгаа гэхэд болно.


Энэ л үед Т.Ганболд шиг бодит баримттайгаар ярьж чаддаг, эрх ашгийн зөрчлөөс ангид, эр зоригтой хүмүүсийн үг, үйлдэл улс төрд илүү чухалд тооцогдох цаг иржээ.


Монголын ирээдүйг зөв голдрилд нь оруулахын тулд шударга дуу хоолойтнууд идэвхтэй үгээ хэлж, ард түмний итгэл найдварын төлөө урагшлах шаардлагатай байна. Тэр дуу хоолойн нэг нь яах аргагүй Т.Ганболд юм.


С.Сарнай