2026 оны төсвийн онцлох 10 баримт

Ерөнхий сайд Г.Занданшатар 2026 оны төсвийн төслөө танилцууллаа. 200 мянган хүний саналыг авч, “Хүний хөгжлийн төлөө” гэх нэршилтэй төсвийн төслөөс онцлох 10 баримтыг хүргэж байна.

1.Төсвийн төсөлтэй цуг татварын ачааг 3-4 их наядаар багасгах цогц өөрчлөлт эхэлж байна. НӨАТ-ын буцаалт сард сая төгрөг хүртэлх худалдан авалтанд 5% болгоно. Нэг удаагийн биш сарын турш дахь сая төгрөгийн худалдан авалт 5%-ийг нь буцаана.

 Жишээ нь, та сард 1 сая 500 мянгаар хоол хүнс авсан бол 1 сая нь 5%-ийн буцаалттай. Эхнэр нөхөр хоёр 750 мянгаар хуваагаад баримтаа бүртгүүлбэл 5%-иа авна.

Ийм маягаар иргэдийн хармаанд 1,3 их наяд төгрөг үлдэнэ. Ирэх жилээс НӨАТ-ын 10% иа бүтэн буцааж авна. Илүү буцаалт авахын тулд иргэн бүрэн хянан шалгагч болцгооно. 

2.Сарын 800 мянга хүртэл орлогын татвар 10%-ийг тооцохгүй. Та 2 саяын цалинтай бол 800 мянгаас нь татвар тооцохгүй. Сард 80 мянга, жилд 960 мянган төгрөг дансанд үлдэнэ гэсэн үг.

3.Шинэ сургууль, цэцэрлэг барих, ширээ сандал, тоног төхөөрөмжинд 1 их наяд төгрөг төсөвлөсөн. Өнгөрсөн оныхоос 2 дахин их хөрөнгө оруулалт. 95 шинэ цэцэрлэг, 108 шинэ сургууль барьж, тоног төхөөрөмжинд 66,7 тэрбум, цалин, урсгал зардалд 100 тэрбумыг тавьсан

4.Эрүүл мэндийн салбарт зориулах хөрөнгө мөнгийг 5,5 дахин огцом нэмэхээр тооцсон. 238,1 тэрбумаас 1,3 их наяд болж, ХСҮТ-2, Гэмтлийн эмнэлгийн хүчитгэлд хөрөнгө хуваарилж,, Зүрх судасны төв, 19 шинэ эмнэлэг барина. Эмнэлгийн тоног төхөөрөмжинд 49,7 тэрбум төгрөг тавьжээ.

5.Жилд 2,5 тэрбумаас бага орлоготой компаниуд жижиг, дунд бизнесийн хөнгөлөлт эдэлнэ. Татварын өртэй бол данс хааж царцаахгүй. Дансан дахь орлогоос нь өрийг нь суутгадаг болно.

6.Эрчим хүчинд 3,9 их наяд төгрөгийн хөрөнгө оруулж, 3515 мянган мВт цагаар үйлдвэрлэлээ нэмнэ. Бусдаас 663,4 мВт гэрэл цахилгаан доллараар авахаа болино.

7.900 тэрбум төгрөгөөр 2000 км шинэ зам, 1317 метр гүүр барина. 223 зам засна.

8.Ашиг биш алдагдал үйлдвэрлэдэг, төрийн өмчит 22 компанийг татан буулгана. Төрийн албан хаагчдыг 13 мянгаар цөөлнө. Төрийн оролцоог хумьж, хувийн хэвшилд зам нээж, давхар авлига, хүнд суртал, цүнх баригчдыг онилно. 

9.Таван боомтын хүчин чадлыг 2-3 дахин нэмж Ган хайлуулах, зэс боловсруулах төсөл эхэлнэ.

10.200 мянган хүн төсвийн төсөлд саналаа өгсөн. Үүнээс 129 мянга нь эрүүл мэнд, 105 мянга нь боловсрол, 88 мянга нь эрчим хүчинд илүү түлхүү анхаарах саналаа өгсөн. Анх удаа иргэдийн саналд тулгуурлаж боловсруулсан, харгалзан тооцсон төсвийн төсөл.