Ардын эмч Ж.Хатанбаатар нь COC олон улсын хүмүүнлэгийн байгууллагын салбар СОС хүүхдийн хотхоныг Монголд байгуулан ажиллуулж, төр засгийн ачааллаас хуваалцаж ирсэн. Гэтэл түүнийг санхүүжилтийг завшсан мэтээр гүтгэж, сүр дуулиантай нэгжлэг хийж, өнөөдөр түүнийг хойшлуулашгүй хэмээн баривчилж саатуулжээ. Төр засгаас санхүүжилт авдаггүй байгууллагыг төсөл хөтөлбөр хэрэгжүүлж байсан байна гэж буруутгаж, бас сүүлийн найман сард ямар санхүүжилтгүй байсан тус газраас мөнгө завшсан мэтээр худал мэдээлэл тарааж баривчилж байхтай зэрэгцээд Хотын дарга Х.Нямбаатар Сүхбаатар дүүрэгт байсан Уламжлалт анагаах ухааны эмийн үйлдвэрийн хууль бусаар нурааж, бас хууль бусаар зарласан газрын дуудлага худалдаагааг явуулав. 

Энэхүү газрын дуудлага худалдаа явуулахаар хотын байгууллагуудаас гаргасан шийдвэрийг Захиргааны хэргийн шүүхээс 2025/04/28-ны өдөр түдгэлзүүлсэн.

Шүүхээс ингэж түдгэлзүүлсэн байхад хотын дарга өөрөө гарч ирээд дуудлага худалдаа зарлаж байгаа нь хууль бус бөгөөд дараа нь өөр бусад хүмүүсийг ч давхар хохироох хууль бус ажиллагаа явуулж байна гэдгийг Ж.Хатанбаатар тавдугаар сарын 20-нд УИХ-ын дарга Д.Амарбаясгалан болон УИХ-ын гишүүдэд хандсан нээлттэй ил захидалдаа тодорхой бичсэн байсан. 

Хотын даргын өөрөө лайвдаад байгаа дуудлага худалдааны цаана байгаа хууль бус үйлдлийг илчилсэн даруй эмчийг СОС хүүхдийн хотхоны санхүүжилтийг завшсан гэж шуурхай нэгжлэг хийж, шөнийн нэг цаг хүртэл АТГ дээр байлгажээ. Харин өнөө өглөө /2025/05/20-ны/ түүнийг хойшлуулашгүй хэмээн хорьж саатуулсан байна. 

Хотын дарга Х.Нямбаатар шүүхээс түдгэлзүүлсэн байхад шүүхээс, хуулиас давж гарсан эрх эдэлж, хууль бус дуудлага худалдаагаа явуулж байгаа газар бол Уламжлалт анагаах ухааны элэг судлалын клиник төвийн Менежментийн хувьчлалд хамаарч байгаа обьект. 

Товчхондоо бол, эзнийг нь төсвөөс санхүүжилт авдаггүй байгууллагын мөнгийг завшсан гэдэг нэр хоч зүүлгэж харлуулж хорьж байгаад газрыг нь зарж байгаа үйл явдал болж байна. 

Менежментийн хувьчлалыг дуусгавар болго гэсэн Улсын дээд шүүхээс эцэслэн гарсан шийдвэрийг хотын дарга Х.Нямбаатар хэрэгжүүлдэггүй бөгөөд харин эсрэгээрээ эмийн үйлдвэрийг нурааж, эмнэлгийг хааж, сувилалд байгаа хөгшчүүлийг ухаан алдуулж, цагдаа хамгаалалтынхнаар дайруулж гээд Монголд улсад анхдагч болох уламжлалт анагаах ухааны эмнэлэг сувилал эмийн үйлдвэр, эмийн ургамлын тариалалт гэсэн цогц бүхий 34 жил тасралтгүй үйл ажиллагаа явуулсан байгууллагыг устгахыг устгаж, зарж үрж байна.  

Хуулийг, шүүхийн шийдвэрийг, хүний эрх энэ тэр гэдэг юм энэ улсад байхгүй байгааг хотын даргын энэ үйлдэл харуулж байна.  

Төрийн гурван өндөрлөг, УИХ-ын гишүүдэд, Хууль зүйн сайдад гээд хотын даргын хууль бус үйлдлийн талаар эмч Ж.Хатанбаатар олон удаа ханджээ. Эрх мэдэлтнүүд иргэдээ сонсдоггүй, тоодоггүй аж. 

Хууль зөрчиж байгааг, шүүхийн шийдвэр хэрэгжихгүй байгааг, хүний эрх зөрчигдөж байгааг та хараад дуугүй байгаад байвал, тан дээр энэ асуудал ирэхэд таныг хамгаалж дуугарах хүн үлдэхгүй гэдэг хүний эрх хамгаалагчдын хэлдэг кейсийг Д.Амарбаясгалан дарга, эрхэм гишүүд уг нь мэддэг л баймаар юм.