sonin.mn
Сэтгэгдэл (0)
Ардчилсан Намын дарга Л.Гантөмөр, Ардчилсан Намын Тэргүүн Дэд дарга С.Баярцогт болон намын дэд дарга нарын төлөөлөл Төрийн ордонд мэдээлэл хийлээ.
Энэ үеэр Ардчилсан Намын дарга Л.Гантөмөр: "Ардчилсан Намын даргын зөвлөл 7 хоног бүр хуралдаж асуудлуудаа ярьж байгаа. Мөн АН-ын даргын дэргэдэх зөвлөлдөх танхим гэж бий. Энэ танхимд АН-ын хуучин удирдлагууд буюу дарга, ЕНБД, ҮАБЗ-ийн гишүүдээс бүрдэх юм. Би эдгээр хүмүүстэй уулзаж, ярилцаж байгаа. Алдсан алдааг нь, олсон ололтуудыг нь ч сонсож байгаа. Хамгийн гол нь олсон ололтуудаас нь ухарч болохгүй. Хуучин удирдлагууд үүнд л санаа зовж байна. Ажил хийдэг хүн өөдөө явдаг боломжийг АН олгосон юм. 1990 оны картын барааны системээс АН салгаж чадсан юм аа. Гадаад паспорт аваад хоол ундтай болсон юм. Үүнийг баталгаажуулах тал дээр анхаараач ээ гэж АН-ын хуучин удирдлагууд надад санал хэлж байна.
 
Ерөнхийлөгч асан Х.Баттулга, Ц.Элбэгдорж, С.Эрдэнэ дарга, Р.Гончигдорж дарга, УИХ-ын дарга асан З.Энхболд гээд эдгээр хүмүүсийн надад өгч байгаа санал зөвлөгөө, санаа зовж байгаа ганц зүйл бол 30 жил дундаж давхарга буюу өөрийгөө авч явдаг Монгол хүний төлөө явсан. Харамсалтай нь сүүлийн 7 жил энэ давхарга алга болчихлоо. Үүн дээр л анхаараарай гэж захиж байна. Түүнээс биш хэн нь ч манай хүнийг сонгуульд дэвшүүлээд өг, энэ хүнийг дарга болгоод өгөөч гэж ярихгүй байна.
 
 
"Хөх Монголын Хөх туг" бол цэвэр АН-ын гишүүдийн хүрээнд зохион байгуулж байгаа ажил. Ардчилсан намын гишүүд, МоАХ-ны гишүүдээ энэ түвшинд сонсох гэж байгаа юм. Өнөөдөр Хөвсгөл аймагт болж байгаа арга хэмжээнд Х.Баттулга , С.Ганбаатар болон АН-ын Дэд дарга П.Галиндэв оролцож байна.
 
 
Гишүүдээ сонсох аян үргэлжлээд яваад байна гэж ойлгох хэрэгтэй. Үүний дараа ард түмнээ сонсох аянд дахиад энэ хүмүүс явна. МАН-ын сүүлийн 8 жилийн мөрийн хөтөлбөр дээр бид дүн шинжилгээ хийж байна. Хамгийн бодитой харагдаж байгаа зүйл бол хүмүүсийн амьжиргаа уначихлаа. Бүх хүн зээлийн хүүгээ төлж чадахаа больж байна. Мөрийн хөтөлбөрийн хэрэгжилтийн ямар ч үнэр алга. Миний бизнес болж байна гэж хэлэх нэг ч хүн алга. Дунд шатны төрийн байгууллагын дарамт хавтгайрсан.
 
МАН бол амьдралын чанарыг дээшлүүлнэ гэж хүчээ нэгтгэсэн улс шүү дээ. Харамсалтай нь амьдралын чанарыг алдчихлаа. Дундаж давхаргыг алдчихлаа. Халамжийн хавтгайрсан бодлогоор дундаж давхаргаа алдчихлаа. Хүмүүс хүлээж байгаад халамж авч, түүгээрээ амьдарч байна үнэн. Гэхдээ тэр хүмүүс ингэж амьдармааргүй байна гэж хэлж байна. Би ажил хийж амьдармаар байна гэж ярьж байна." гэв. 
 
 
М.Чой