sonin.mn
Сэтгэгдэл (0)

БЕРЛИН, 2025 оны дөрөвдүгээр сарын 4 /DW/. АНУ-ын Ерөнхийлөгч Дональд Трампын зүгээс үзүүлэх шахалт нэмэгдэж байгаа энэ үед ОХУ зэрэг газрын тос экспортлогч 23 улс багтдаг ОПЕК+ бүлгийн найман улс олборлолтоо эрс нэмэгдүүлэхээр шийдвэрлэснээ өчигдөр мэдэгджээ. 


Тодруулбал, ОПЕК+ - ийн гол гишүүн орнууд болох Саудын Араб, ОХУ, Арабын Нэгдсэн Эмирт Улс, Кувейт, Ирак улсууд тавдугаар сараас эхлэн нийлүүлэлтээ өдөрт 411 мянган баррелиар нэмэгдүүлэх бөгөөд энэ нь 2020 оноос хойших хамгийн өндөр үзүүлэлт юм.  


Өнөөдрийг хүртэл гурав дахин бага буюу өдөрт дунджаар 138 мянган баррелиар нэмэгдүүлэхээр төлөвлөж байжээ. Олборлолтын нийт хэмжээ өдөрт 2.2 сая баррелиар нэмэгдэх ёстой бөгөөд Норвег (өдөрт 2 сая баррель), Мексик эсвэл Казахстаны (тус бүр 1.9 сая баррель) олборлолтын хэмжээтэй ижил түвшинд хүрнэ гэсэн үг юм.


"Олборлолтын хэмжээг нэмэгдүүлэх шийдвэрийг нөхцөл байдлаас шалтгаалан түр зогсоох эсвэл цуцлах боломжтой. Уян хатан зохицуулалт хийснээр гишүүн орнуудад өмнө нь бууруулаагүй хэмжээг нөхөх боломжийг олгоно" гэж ОПЕК мэдэгджээ.


Дээрх найман орны дараагийн уулзалтыг тавдугаар сарын 5-нд товлосон бөгөөд тухайн уулзалтаар зургаадугаар сараас эхлэх олборлолтын квотыг хэлэлцэх юм. Шинэ төлөвлөгөөгөөр тавдугаар сард Оросын олборлолтын квот өдөрт 9.083 сая баррель, Саудын Арабынх өдөрт 9.2 сая баррель байх ажээ. Ойрын саруудад зах зээлд их хэмжээний газрын тос нийлүүлэх төлөвтэй байгаа нь газрын тосны үнийг унагажээ. Хилийн чанадаас нийлүүлж буй бүх бараанд татвар ногдуулахаар шийдвэрлэснээ Д.Трампын засаг захиргаа мэдэгдсэний дараа газрын тосны үнэ буураад байсан юм. Лондоны ICE биржийн арилжааны явцад Brent маркийн газрын тосны фьючерс үнэ 5-аас илүү хувиар унаж, нэг баррель нь 70 ам.доллароос доошилсон байна.



Д.Жаргал

Эх сурвалж: "Монцамэ" агентлаг