sonin.mn
Сэтгэгдэл (0)

ВАШИНГТОН, 2025 оны дөрөвдүгээр сарын 4 /CNBC/. АНУ-ын Ерөнхийлөгч Дональд Трамп гадаадын бүх бараанд татвар ногдуулах шийдвэрээ танилцуулснаар дэлхийн худалдааны дайнаас үүдэлтэй эдийн засгийн хямрал нүүрлэх эрсдэл нэмэгдсэний улмаас пүрэв гарагт хувьцаануудын ханш огцом унаж, S&P 500 индекс 2020 оноос хойш хамгийн ихээр буурчээ.  


Тодруулбал, S&P 500 индекс 4.84 хувиар буурч 5396.52 нэгж болсноор 2020 оны зургаадугаар сараас хойших хамгийн таагүй өдөр тохиосон бол Dow Jones индекс 1679.39 нэгж буюу 3.98 хувиар унасан нь мөн л 2020 оны зургаадугаар сараас хойш өдөрт хамгийн их буурсан тохиолдол болжээ. 


Түүнчлэн Nasdaq индекс 5.97 хувиар унаж 16550.61 нэгж болсон нь 2020 оны гуравдугаар сараас хойших хамгийн том уналт юм. Пүрэв гарагт Трампын зарласан шийдвэрээс үүдэн S&P 500 индекс өнгөрсөн 11 дүгээр сард Д.Трамп сонгуульд ялахаас өмнөх хамгийн доод түвшинд хүргэжээ. Үүний зэрэгцээ үндэстэн дамнасан корпорацуудын хувьцааны ханш огцом уналаа. 


Тухайлбал, Nike болон Apple компанийнх 14 болон 9 хувиар тус тус буурчээ. 


Түүнчлэн томоохон импортлогчид хамгийн их хохирол амссан бөгөөд Five Below-ын ханш ойролцоогоор 28 хувиар, Dollar Tree 13 хувиар, Gap 20 хувиар тус тус унасан байна. Технологийн компанийн хувьцаануудын тухайд Nvidia-гийнх 8 орчим хувь, Tesla-гийн 5 гаруй хувиар буурчээ. Бүх улс оронд 10 хувийн суурь тариф ногдуулах шийдвэр дөрөвдүгээр сарын 5-наас хэрэгжиж эхэлнэ. Түүнчлэн АНУ-д өндөр татвар ногдуулдаг улс орнуудад ойрын үед илүү их татвар ногдуулна гэж Д.Трамп мэдэгдсэн байна. Пүрэв гарагт зах зээлийн уналт болсныг тэрбээр хүлээн зөвшөөрч, татварын хэрэгжилтийг “өвчтөнд мэс засал хийхтэй” адилтган зүйрлэжээ. “Хөрөнгийн зах зээл тэлж, жинхэнэ тэсрэлт болно. Хувьцааны ханш өсна. Манай улсын эдийн засаг хурдацтай өснө. Дэлхийн бусад улс орнууд хэлэлцээр байгуулах арга замуудыг хайх болно" гэж Д.Трамп хэлжээ.



Э.Хулан

Эх сурвалж: "Монцамэ" агентлаг