sonin.mn
Сэтгэгдэл (0)

ЛОНДОН, 2025 оны дөрөвдүгээр сарын 3 /Reuters/. АНУ-ын Ерөнхийлөгч Дональд Трампын засаг захиргаа татварын шинэ бодлого хэрэгжүүлж буй энэ үед тайван байдлаа хадгалж, Америктай худалдааны гэрээ байгуулах чиглэлд анхаарч ажиллана гэж Их Британийн Бизнес, худалдааны сайд Жонатан Рейнолдс мэдэгджээ.


"АНУ бол манай ойрын холбоотон. Тиймээс бидний байр суурь өөрчлөгдөхгүй бөгөөд тайван байж, энэхүү хэлэлцээрийг байгуулахын тулд тууштай ажиллана. Бидний зорилго бол өнөөдөр зарласан шийдвэрийн сөрөг нөлөөг багасгах явдал юм" гэж сайд мэдэгджээ.


Тэрбээр цааш нь хэлэхдээ "бидэнд олон арга хэрэгсэл бий бөгөөд тэдгээрийг хэрэглэхээс татгалзахгүй. Бидний зүгээс цаашид авах арга хэмжээний нөлөөллийг үнэлэхийн тулд Британийн бизнес эрхлэгчидтэй хамтран ажиллана" гэв. Өмнө нь Их Британийн Засгийн газрын тэргүүн Кир Стармер Вашингтоны татварын шийдвэрийн хариуд яаран алхам хийхгүй гэж мэдэгдсэний зэрэгцээ улс орон, бизнес эрхлэгчдийнхээ эрх ашгийг хамгаална гэдгийг онцолсон байна.


Хилийн чанадаас нийлүүлж буй бүх бараанд татвар ногдуулах шийдвэр гаргаснаа Д.Трамп өчигдөр буюу лхагва гарагт мэдэгджээ. Их Британийн хувьд энэ татвар 10 хувь байх бөгөөд Цагаан ордны тэргүүний мэдэгдсэнээр хамгийн доод хэмжээ юм.


Харин Европын Холбооны орнуудаас нийлүүлж буй бараанд 20 хувийн татвар ногдуулах ажээ. Үүнээс гадна, АНУ-д нийлүүлэх бүх төрлийн авто машинд 25 хувийн татвар ногдуулах шийдвэр Их Британид мөн хамаарах юм. Энэ шийдвэр дөрөвдүгээр сарын 3-наас хэрэгжиж эхэлнэ. Их Британиас АНУ-ын зах зээлд жил бүр нийт 7.6 тэрбум фунт стерлинг буюу 9.9 тэрбум ам.долларын үнэтэй 100 мянга орчим авто машиныг экспортолдог. Америкийн зах зээл дээр худалдаалагдаж буй Британийн автомашины хамгийн алдартай загварууд бол “Range Rover”, “Bentley”, “Aston Martin”, “Rolls-Royce”, “Lotus”, “Mini” юм. Их Британийн авто машины экспортын 17 хувь нь АНУ-ын зах зээлд ногддог байна. 



Д.Жаргал

Эх сурвалж: "Монцамэ" агентлаг