sonin.mn
Сэтгэгдэл (1)

ВАШИНГТОН, 2025 оны дөрөвдүгээр сарын 3 /BBC/. АНУ-ын Ерөнхийлөгч Дональд Трамп хилийн чанадаас нийлүүлж буй бүх бараанд ногдуулах татварыг танилцуулснаас хойш хэдхэн цагийн дараа Сенатын танхим Канадад ногдуулах шинэ татварыг цуцлах тухай хуулийг баталжээ. 


Уг хуулийн төслийг батлахыг Бүгд найрамдах намынхан олонх болж буй Сенатын 51 гишүүн дэмжсэн бол 48 гишүүн эсрэг санал өгчээ. Ардчилсан намынхны санаачилсан хуулийн төслийг Бүгд найрамдах намын дөрвөн гишүүн дэмжсэн байна.


Харин Д.Трампын намынхан олонх болж буй Төлөөлөгчдийн танхимд уг хуулийг батлах магадлал тун бага гэж ажиглагчид үзэж байна. Төлөөлөгчдийн танхимын гишүүд баталсан тохиолдолд Д.Трамп хуулийн төсөлд хориг тавих боломжтой.


Хуулийг дэмжигчдийн нэг болох Сенатад Мэн муж улсаас сонгогдсон Бүгд найрамдах намын гишүүн Сюзан Коллинз хэлэхдээ, Канадын бараанд ногдуулах татвар нь Мэн муж улсын олон гэр бүл болон орон нутгийн эдийн засагт сөргөөр нөлөөлнө гэдгийг анхааруулжээ. 


Мөн Кентаккигийн Рэнд Пол, Аляскийн Лиза Мурковски, Кентаккигийн Митч Макконнелл зэрэг бүгд найрамдахчууд дэмжсэн санал өгсөн байна. АНУ-Канадын худалдаа бол хоорондоо нягт уялдаатай бөгөөд Канадын тал хариу арга хэмжээ авч, холбоотнуудын хооронд худалдааны дайн дэгдэх аваас ноцтой үр дагавартай гэдгийг эдийн засагчид анхааруулж байна.

 


Э.Хулан

Эх сурвалж: "Монцамэ" агентлаг