sonin.mn
Сэтгэгдэл (0)

ТОКИО, 2025 оны дөрөвдүгээр сарын 3 /TASS/. АНУ-ын Ерөнхийлөгч Дональд Трамп импортын бүх бараанд татвар ногдуулах шийдвэр гаргасантай холбоотойгоор Азид хамгийн томд тооцогддог Токиогийн хөрөнгийн биржийн өнөөдрийн арилжаа уналтаар эхэлжээ. Японы тэргүүлэгч 225 компанийн хувьцааны ханшийн хэлбэлзлийг харуулдаг "Nikkei" индекс арилжаа эхлэх үед 4.4 хувиар буурч, 34 138 пункт болсон байна.


Хамгийн сүүлд "Nikkei" индекс 2024 оны наймдугаар сард 35 000 пунктээс доошилж байсан бөгөөд тухайн үед АНУ-д хямрал үүсэх вий гэсэн болгоомжлолоос үүдэн дэлхийн зах зээл уналтад орж байсан юм.


Автомашин үйлдвэрлэгч томоохон компаниудын хувьцаа мөн буурсан байна. Тухайлбал, "Nissan" компанийн хувьцааны ханш 5.99 хувиар, "Honda" компанийнх 5.09 хувиар унажээ. Хилийн чанадаас нийлүүлж буй бүх бараанд ногдуулах татварын доод хэмжээг 10 хувиар тогтоох шийдвэр гаргаснаа Д.Трамп өчигдөр буюу лхагва гарагт мэдэгджээ. Тэрбээр улс орнуудад тус тусад нь тариф тогтоосон бөгөөд Японы бараанд 24 хувийн татвар ногдуулжээ.



Д.Жаргал

Эх сурвалж: "Монцамэ" агентлаг