sonin.mn
Сэтгэгдэл (0)

САН-ХОСЕ, 2025 оны дөрөвдүгээр сарын 2 /DW/. Ерөнхийлөгч Д.Трампыг олон нийтийн сүлжээгээр шүүмжилснээс хойш хэдхэн долоо хоногийн дараа АНУ-ын эрх баригчид хилээр нэвтрэх визийг нь цуцалсан тухай Коста-Рикагийн Ерөнхийлөгч асан, Нобелийн шагналт Оскар Ариас гэж мэдэгджээ.


Тэрбээр мягмар гарагт сэтгүүлчдэд хандаж хэлэхдээ “АНУ-ын засгийн газраас миний визийг түдгэлзүүлсэн тухай цахим шуудан хүлээн авлаа. Мэдэгдэл маш богинохон бөгөөд түүнд ямар ч шалтгаан дурдаагүй байсан” гэлээ.


1987 онд Нобелийн Энх тайвны шагнал хүртэж байсан О.Ариас хоёрдугаар сард Facebook хуудсандаа “Д.Трамп Ромын эзэн хаан шиг аашилж байна” гэж бичжээ. “Ерөнхийлөгч нь Ромын эзэн хаан шиг аашилж, дэлхий дахинд юу хийхийг нь зааж байгаа үед АНУ-ын засгийн газартай санал нийлэхгүй байх нь жижиг улсын хувьд амар байгаагүй” гэж тэрбээр хэлсэн байна.


Хоёрдугаар сард АНУ-ын Төрийн нарийн бичгийн дарга Марко Рубиогийн Коста-Рикад хийсэн айлчлалын өмнөхөн бичсэн нийтлэлд О.Ариас мөн АНУ-ыг “дайсан хайж буй улс” хэмээн тодорхойлжээ.


Бүс нутаг дахь Хятадын нөлөөг тогтоон барихыг АНУ эрмэлзэж буй үед Ерөнхийлөгч Родриго Чавесын засаг захиргаа АНУ-ын дарамт шахалтад бууж өгч, албадан гаргасан цагаачдыг хүлээж авч байгааг О.Ариас олон нийтийн сүлжээгээр шүүмжилсэн байна. Түүнчлэн тус бүс нутаг дахь Хятадын нөлөөг бууруулахад чиглэсэн Ерөнхийлөгч Чавесын бодлогыг дэмжээгүй Коста-Рикагийн хууль тогтоогчдын визийг АНУ хүчингүй болгожээ. Өдгөө 84 настай О.Ариас 1986-1990, 2006-2010 онд Коста-Рика улсын ерөнхийлөгчөөр ажиллаж байв.




Э.Хулан

Эх сурвалж: "Монцамэ" агентлаг