sonin.mn
Сэтгэгдэл (2)

ВАШИНГТОН, 2025 оны дөрөвдүгээр сарын 2 /CNN/. АНУ-ын сенатч Кори Букер Сенатын танхимд хоёр өдөр дамнан үг хэлж, Ерөнхийлөгч Дональд Трампын засаг захиргааны зүгээс Америкийн олон нийтэд учруулж буй хохирлын талаар сэрэмжлүүлжээ.


Нью-Жерси муж улсаас Сенатад сонгогдсон Ардчилсан намын гишүүн тэрбээр 25 цаг 4 минутын турш үг хэлж, Сенатын түүхэнд хамгийн удаан үг хэлсэн рекордыг эвдсэн байна. Өмнө нь сенатч агсан Стром Турмонд 1957 онд хамгийн удаан буюу 24 цаг 18 минутын турш илтгэл тавьж байв.


К.Букер орон нутгийн цагаар даваа гаргийн 19:00 цагт үг хэлж эхэлсэн бөгөөд илтгэлийнхээ эхэнд чадлынхаа хэрээр удаан үг хэлнэ гэж хэлсэн байна. Улмаар түүний илтгэл шөнөжин үргэлжилж, мягмар гаргийн өглөөг дамнан орой хүртэл үргэлжилжээ. Ардчилсан нам сонгогчдын зүгээс Д.Трампын эсрэг хатуу байр суурь баримтлах шахалттай тулгараад байгаа үед Сенат дахь Ардчилсан намын гишүүн К.Букер ийнхүү урт илтгэл тавьсан байна. Өдгөө 55 настай К.Букер хэлсэн үгэндээ, Д.Трампын удирдлага дор холбооны засгийн газрыг үр ашгийг дээшлүүлэх Илон Маскийн хүчин чармайлтыг шүүмжилсэн төдийгүй сая сая америкчуудад зориулсан эрүүл мэндийн тусламж үйлчилгээний гол хөтөлбөрүүдийг танаж болзошгүйг сэрэмжлүүлж, улс орон хямралд ороод буйг сануулсан байна.


“Ердөө 71 хоногийн дотор АНУ-ын Ерөнхийлөгч америкчуудын аюулгүй байдал, санхүүгийн тогтвортой байдал, манай ардчиллын үндэс суурь зэрэгт маш их хохирол учрууллаа. Эдгээр нь Америкийн хувьд хэвийн зүйл биш бөгөөд Сенат үүнийг ердийн зүйл мэт хайхрахгүй өнгөрөөж болохгүй” гэж тэрбээр хэлжээ.


2013 оноос хойш Сенатын гишүүнээр ажиллаж буй К.Букер бол Нью-Жерси муж улсыг Сенатад төлөөлж буй анхны өнгөт арьстай америк хүн бөгөөд өдгөө 100 гишүүнтэй танхим дахь өнгөт арьст таван сенатчийн нэг юм.



Э.Хулан

Эх сурвалж: "Монцамэ" агентлаг