БЕРЛИН, 2025 оны дөрөвдүгээр сарын 2 /DW/. Холбооны Бүгд Найрамдах Герман Улсын (ХБНГУ) Ерөнхийлөгч Франк-Вальтер Штайнмайерын инстаграм хуудсанд "Уулын Карабахын Бүгд Найрамдах Улс"-ын (УКБНУ) далбааг нийтэлсэнд түүний ажлын алба Азербайжан улсаас уучлалт хүссэн тухай Азербайжаны “Azertag” агентлаг мэдээлжээ. ХБНГУ-ын Ерөнхийлөгч гуравдугаар сарын 31-ний өдөр Арменид айлчилсан бөгөөд энэ үеэр Штайнмайерын хуудсанд УКБНУ-ын далбааг нийтэлсэн байна. 

Азербайжаны Гадаад хэргийн яам мөн өдөр уг постыг "улс төрийн илт өдөөн хатгалга" гэж мэдэгдээд, уучлалт гуйхыг шаардсан байна. Түүнчлэн Германы Элчин сайд Ральф Хорлеманыг дуудан ирүүлж, эсэргүүцлээ илэрхийлжээ.

ХБНГУ-ын Ерөнхийлөгчийн Тамгын газрын дарга Дорте Дингер Азербайжаны ерөнхийлөгчийн туслах Хикмет Гажиевт уучлал хүссэн захидлыг илгээж, уг постыг "техникийн алдааны" улмаас нийтэлсэн бөгөөд дараа нь "нэн даруй устгасан" гэжээ. Энэхүү пост нь "Азербайжаны газар нутгийн бүрэн бүтэн байдлын талаар баримталж буй Германы албан ёсны байр суурийг ямар нэгэн байдлаар тусгаагүй гэдгийг Дингер дурдсан байна. "Алдаа гаргасандаа гүнээ харамсаж байна. Энэ пост нь Азербайжаны зарим иргэнд буруу сэтгэгдэл төрүүлсэнд чин сэтгэлээсээ уучлалт гуйж байна" гэж захидалд бичжээ.

Штайнмайер: Армени, Азербайжаны хооронд энх тайван тогтоох нь бүс нутагт ашиг тусаа өгнө

Арменид хийсэн айлчлалынхаа хоёр дахь өдөр буюу дөрөвдүгээр сарын 1-нд Франк-Вальтер Штайнмайер мэдэгдэхдээ, Армени, Азербайжаны хооронд энх тайван тогтоох нь бүс нутагт ач тусаа өгнө гэжээ. "Хэрэв тус хоёр орны хооронд энх тайван тогтоох асуудлаар эцэслэн тохиролцож чадвал Өмнөд Кавказын бүс нутаг бүхэлдээ ашиг тусыг нь хүртэнэ гэдэгт би бат итгэлтэй байна" гэж Германы Ерөнхийлөгч хэлсэн байна.

Армени, Азербайжан улсууд энхийн хэлэлцээр байгуулахаар тохиролцжээ 

Хуучин ЗХУ-ын бүрэлдэхүүн байсан Армени, Азербайжан улсууд хэдэн арван жилийн дараа энхийн хэлэлцээр байгуулах тохиролцоонд хүрчээ. Тус хоёр улс Уулын Карабахын асуудлаар сөргөлдсөөр ирсэн юм. Азербайжаны Гадаад хэргийн сайд Жейхун Байрамов гуравдугаар сарын 13-нд мэдэгдэхдээ "Арменийн талтай энхийн хэлэлцээр байгуулах асуудлаар яриа хэлэлцээ хийх үйл явц дууссан" гэжээ.

Харин Арменийн Гадаад хэргийн яам "Бүгд Найрамдах Армен Улс, Бүгд Найрамдах Азербайжан Улсын хооронд энх тайван, улс хоорондын харилцаа тогтоох тухай" хэлэлцээрт гарын үсэг зурахад бэлэн болсон гэж мэдээлсэн байна.

Баримт бичигт гарын үсэг зурах хугацаа, газрын талаар Азербайжаны талтай зөвлөлдөж эхлэхэд бэлэн байгааг мэдэгдэлд дурджээ. Армени, Азербайжан хоёр улс Энхийн хэлэлцээрийн 17 заалтын 15-ыг тохиролцсон гэдгийг өмнө нь мэдэгдэж байсан юм. Одоо Олон улсын шүүхэд харилцан нэхэмжлэл гаргахгүй байх, мөн хилийн бүсэд гуравдагч орны цэргийг байрлуулахгүй байх гэсэн хоёр заалтыг зөвшилцөх үлджээ.

Д.Жаргал

Эх сурвалж: "Монцамэ" агентлаг