sonin.mn
Сэтгэгдэл (2)

ВАШИНГТОН, 2025 оны гуравдугаар сарын 17 /DW/. Киевийн холбоотон орнууд Украины дайныг дуусгахын тулд Орост шахалт үзүүлэхээр тохиролцсоноос хэдхэн цагийн дараа АНУ-ын Төрийн нарийн бичгийн дарга Марко Рубио ОХУ-ын Гадаад хэргийн сайд Сергей Лавровтой утсаар ярьжээ. М.Рубио, С.Лавров нар "Саудын Арабад саяхан хийсэн уулзалтын дараа хийх цаашдын алхмуудыг ярилцаж, АНУ, ОХУ-ын харилцааг сэргээх талаар үргэлжлүүлэн ажиллахаар тохиролцлоо" гэж АНУ-ын Төрийн департамент мэдэгдсэн байна. 


Үүнээс гадна, М.Рубио АНУ-ын Зэвсэгт хүчин Ираны дэмжлэгтэй хуситуудын эсрэг Йеменд цэргийн ажиллагаа эхлүүлсэн тухай С.Лавровт мэдэгдсэн гэж Төрийн департаментын төлөөлөгч Тэмми Брюс мэдээлжээ. 


ОХУ-ын Гадаад хэргийн яамнаас мэдээлснээр, Америкийн талын санаачилгаар утсаар ярих үеэр С.Лавров хуситуудын эсрэг явуулж буй ажиллагааны үеэр "хүч хэрэглэхийг нэн даруй зогсоох шаардлагатайг" дурдаад, цус урсгахгүй байх шийдлийг олохын тулд улс төрийн яриа хэлэлцээ хийх нь бүх талд чухал болохыг онцолсон байна. Өнгөрсөн долоо хоногийн бямба гарагт Европын Холбооны орнуудын удирдагчид болон НАТО-гийн төлөөлөгчид Их Британийн Ерөнхий сайд Кир Стармерын санаачилгаар цахимаар уулзаж, гал зогсоохыг зөвшөөрүүлэхийн тулд ОХУ-д "хамтын шахалт" үзүүлэхээр тохиролцжээ. 




Д.Жаргал

Эх сурвалж: "Монцамэ" агентлаг