ТЕЛЬ-АВИВ, 2025 оны хоёрдугаар сарын 27 /АР/. Израил руу довтлох үеэрээ барьцаалсан дөрвөн хүний цогцсыг ХАМАС бүлэглэл пүрэв гарагт шилжих шөнө Улаан Загалмайн нийгэмлэгийн ажилтнуудад хүлээлгэн өгсөн тухай Израилын аюулгүй байдлын алба мэдээлжээ. 

Цогцсуудыг "Керем-Шалом" шалган нэвтрүүлэх цэгт Израилын Батлан хамгаалах хүчинд (IDF) хүлээлгэн өгөх ёстой бөгөөд гал зогсоох хэлэлцээрийн хүрээнд хүлээн авах ёстой хүмүүсийн цогцос мөн эсэхийг таних ажиллагааг Израилын тал явуулах юм. 

“The Times of Israel” сонинд мэдээлснээр, Нир Оз Итцик хотын оршин суугчид болох 69 настай Итзик Эльгарат, 49 настай Цахи Идан, 85 настай Шломо Манцур болон өөр нэг хүний цогцсыг Израилын талд хүлээлгэн өгөх ёстой. Манцур бол террористуудад барьцаалагдсан израилчуудаас хамгийн ахмад нь юм. Халдлага болсон өдөр буюу 2023 оны аравдугаар сарын 7-нд түүнийг хөнөөж, цогцсыг нь Газын зурвас руу авч явсан гэж таамаглаж байгаа ажээ.

Хоёр талын хэлэлцээрийн хүрээнд Израилын шоронгоос суллагдсан Палестины хоригдлуудыг тээвэрлэж явсан автобус Баруун эргийн төв хэсэгт орших Рамалла хотод ирсэн гэж AFP мэдээлжээ. 

Барьцаанд байхдаа амиа алдсан дөрвөн хүний цогцсыг хүлээлгэн өгөх талаар Израилын талтай тохиролцсон тухай ХАМАС бүлэглэл хоёрдугаар сарын 25-нд мэдээлжээ. Энэ мэдээллийг мөн өдөр Израилын албан тушаалтнууд баталсан байна. 

Өмнө нь хоёрдугаар сарын 23-нд Израилын Ерөнхий сайд Биньямин Нетаньяху хэлэхдээ, ХАМАС бүлэглэл барьцаалсан хүмүүсийг хүлээлгэн өгөхдөө "тохуурсан үйлдлүүд хийхээ" болих хүртэл Газын зурваст гал зогсоох хэлэлцээрийн хүрээнд хоёрдугаар сарын 22-нд товлосны дагуу Палестины 600 гаруй хоригдлыг суллахаа хойшлуулж байна гэж мэдэгджээ. 

Хоёрдугаар сарын 22-нд ХАМАС бүлэглэл Израилын зургаан иргэний иргэнийг барьцаанаас суллаж, хэлэлцээрийн эхний үе шат дууссаныг мэдэгджээ. Израилын тал мөн өдөр шоронгоос 602 палестин хоригдлыг суллах ёстой байсан боловч суллахаа хойшлуулсан гэдгийг ХАМАС мөн өдрийн орой мэдэгдэхдээ, Израилыг гал зогсоох хэлэлцээрийг зөрчсөн гэж буруутгасан байна. Гуравдугаар сарын 2-ныг хүртэл үргэлжлэх тохиролцооны эхний шатанд Израилын 25 иргэнийг суллаж, найман хүний цогцсыг хүлээлгэн өгөх ёстой.

Д.Жаргал

Эх сурвалж: "Монцамэ" агентлаг