sonin.mn
Сэтгэгдэл (19)

Шинэчлэлийг одоогийн хурдаар нухацтай үргэлжлүүлэх аваас Украин улс 2030 оноос өмнө Европын Холбоонд элсэх боломжтой хэмээн Европын Комиссын дарга Урсула фон дер Ляйен даваа гарагт мэдэгдлээ. Тэрбээр Украины Ерөнхийлөгч В.Зеленский болон Киев хотноо хүрэлцэн ирсэн бусад улсын удирдагчдын хамт хийсэн хэвлэлийн хурлын үеэр энэхүү мэдэгдлийг хийжээ.


Дайны маш хүнд нөхцөлд Украинд явагдаж буй шинэчлэлийн хурд, чанар, үр дүн нь өөрийг нь гайхшруулсан гэдгийг Урсула фон дер Ляйен хэлсэн байна.


Украинд дэгдсэн дайн бол Европын ирээдүйд нөлөөлөх хамгийн гол ноцтой хямрал хэвээр байна гэдгийг тэрбээр онцлон тэмдэглээд “одоогоор Оросын эсрэг хоригуудыг цуцлах боломжгүй байгаа бөгөөд энхийг тогтоох эрмэлзэлтэй байгааг нь нотлох алхмуудыг Орос улс хийхгүй байна” гэжээ. Мөн Киевийн уулзалтын үеэр Европын Зөвлөлийн дарга Антониу Кошта үг хэлэхдээ “Украин ЕХ-нд элсэх нь ирээдүйд тус улсын аюулгүй байдлын чухал баталгаа болно” гэдгийг онцолсон байна.


Тэрбээр Орос-Украины дайныг зогсоох хэлэлцээг эхлүүлэх талаар АНУ-ын Ерөнхийлөгч Д.Трампын гаргаж буй хүчин чармайлтыг сайшаагаад, энэ дайн бол зөвхөн Украинтай бус Европын аюулгүй байдалтай холбоотой гэдгийг сануулан дурдсан байна.


Киевт хуран цугларсан ЕХ-ны гишүүн орнуудын төр, засгийн тэргүүн нар Украинд дахин шинээр багц тусламжуудыг олгохоор шийдвэрлэснээ зарлан мэдэгдлээ. Тухайлбал, гуравдугаар сард гэхэд 3,5 тэрбум еврогийн зээл олгох бөгөөд энэ мөнгийг Барууны банкуудад царцаагдсан Оросын хөрөнгөнөөс гаргах ажээ. Мөн Канадын Ерөнхий сайд Ж.Трюдо Киевт 5 тэрбум ам.долларын тусламж үзүүлэхээ амласан байна. Оросын цэрэг Украинд халдан довтолсноос хойш яг гурван жил өнгөрч буй энэ өдөр Украиныг дэмжигч улс орнууд нийтдээ 10 тэрбум еврогийн тусламж амлажээ.



Б.Адъяахүү