sonin.mn
Сэтгэгдэл (8)

НЬЮ-ЙОРК, 2025 оны нэгдүгээр сарын 3 /Bloomberg/. Пүрэв гарагт буюу шинэ оны арилжааны эхний өдөр Европт хийн үнэ 2023 оны 10 дугаар сараас хойших хамгийн дээд түвшиндээ хүрч, нэг мегаватт/цаг нь 50.3 еврод (мянган шоо метр тутамд 526 орчим евро орчим) хүрсэн тухай Bloomberg агентлаг мэдээлэв. Хийн үнэ өссөн шалтгаан нь Украины нутгаар дамжин өнгөрдөг Оросын байгалийн хийн тээвэрлэлт зогссон, мөн Норвегийн “Hammerfest LNG” үйлдвэрийн шахуургад доголдол гарч, нэгдүгээр сарын 9 хүртэл үйл ажиллагаагаа зогсоосон, Европын хойд нутагт эрс хүйтэрч, хийн хэрэглээ нэмэгдсэн зэргээс үүдэлтэй хэмээн шинжээчид тайлбарлаж байна. 


"Норвегийн шингэрүүлсэн хийн нийлүүлэлт буурснаар энэ долоо хоногт хийн нөөцөөс их хэмжээгээр ашиглахад хүрч болзошгүй байна. Европ тивийн хийн нөөцийн хэмжээ байгалийн хийн хямрал дөнгөж эхэлж байсан 2021 оноос хойш хамгийн хурдацтай багасаж байна" гэж Bloomberg бичжээ.


Гэсэн хэдий ч Европын Комиссоос мэдэгдэхдээ "бэлтгэл ажлыг сайтар хангаж, зохицуулсны ачаар Төв болон Зүүн Европт байгалийн хийн нийлүүлэлтэд саатал гарахгүй" гэжээ. "Хийн хангамжийг өөр чиглэлээр (Герман, Итали) болон хадгалах байгууламжаас нийлүүлнэ" гэж тус комиссын цахим хуудсанд мэдээлсэн байна.



Д.Жаргал

Эх сурвалж: "Монцамэ" агентлаг