Ням - 01 сарын 05,
2025
СӨҮЛ, 2025 оны нэгдүгээр сарын 3 /Yonhap/. БНСУ-ын Ерөнхийлөгч Юн Сог Ёлийг онц байдал тогтоосонтой нь холбогдуулан саатуулах тушаалыг гүйцэтгэхээр ерөнхийлөгчийн ордонд ирсэн мөрдөгчдийг ордныг хамгаалж буй цэргүүд нэвтрүүлэхгүй байна гэж цагдаагийн газрын төлөөлөгч мэдээлжээ. Өндөр албан тушаалтнуудын авлигын хэргийг мөрдөн шалгах газраас /CIO/ хэвлэлийнхэнд мэдэгдэхдээ, тушаалыг гүйцэтгэх ажиллагаа эхэлсэн боловч Нийслэлийн батлан хамгаалахын командлалын харьяа цэргийн ангийн алба хаагчид мөрдөгчдийг ордонд оруулахгүй байгаа ажээ.
Юн Сог Ёлийг 12 дугаар сарын 3-нд богино хугацаанд онц байдал тогтоосонтой холбогдуулан бослого гаргасан, эрх мэдлээ урвуулан ашигласан хэргээр саатуулах тушаалыг гүйцэтгэхэд даваа гараг хүртэл хугацаа бий.
Харин Юн Сог Ёлийг дэмжигчид ерөнхийлөгчийн ордны гадаа жагсаал зохион байгуулж байгаа нь CIO-ын ажиллагаанд хүндрэл учруулж байгаагаас гадна Ерөнхийлөгчийн хамгаалалтын албаныхантай мөргөлдөөн үүсгэж болзошгүй байна. Юн Сог Ёльд импичмент зарласныг эсэргүүцэж, түүнийг саатуулахад саад учруулахаар сүүлийн өдрүүдэд тус ордны ойролцоо олон мянган дэмжигчид цугларсаар байна. Тэдний заримыг нь цагдаа нар хүчээр тараажээ. Ажиглагчдын үзэж буйгаар, бямба, ням гарагт тушаалыг гүйцэтгэхэд илүү олон хүний эсэргүүцэлтэй тулгарч, даваа гараг гэхэд эцсийн хугацаа дуусахад хэт ойртсон байх болно.
СIO-гийнхэн Юн Сог Ёлийн шийдвэрийг хамтран шалгахаар цагдаагийн газар болон Батлан хамгаалах яамны мөрдөн байцаах албатай хамтарсан баг байгуулжээ. Тушаалыг гүйцэтгэх баг нь СIO-ын 30 хүн, цагдаагийн 120 албан хаагчаас бүрдсэн бөгөөд тэдний 70 нь ордны гадаа хүлээж байна.
Юн Сог Ёль байцаалт авах гурван зарлан дуудах хуудсыг үл тоомсорлосны дараа CIO түүнийг саатуулах зөвшөөрөл хүсжээ. Мөн тус агентлаг ерөнхийлөгчийн өргөөнд нэгжлэг хийх зөвшөөрөл авсан байна. Харин Юн Сог Ёлийн өмгөөлөгчид тэдгээр зөвшөөрлийг “хууль бус, хүчингүй” гэж нэрлээд, тушаалыг гүйцэтгэхэд хориг тавихыг шүүхээс хүсжээ.Баасан гарагт Ерөнхийлөгчийн өмгөөлөгчдийн нэг Юн Гап Гюн Yonhap агентлагт мэдээлэл өгөх үеэрээ, CIO-гийн оролдлогын эсрэг “хууль ёсны арга хэмжээ” авах болно гэсэн байна.
Хэрэв Ерөнхийлөгчийн хамгаалалтын алба, Юн Сог Ёлийг дэмжигчид CIO-гийн баривчлах ажиллагааг зогсоохыг оролдвол цагдаа нар тэднийг албан үүргээ биелүүлэхэд нь саад учруулсан хэргээр баривчлах болно гэдгээ мэдэгджээ.
Юн Сог Ёль баривчлагдвал мөрдөгчид түүнийг Уйван хот дахь Сөүлийн урьддчилан хорих төвд саатуулах бөгөөд үүний өмнө Сөүлээс өмнө зүгт орших Гвачон хот дахь CIO-гийн төв байранд аваачиж байцаахаар төлөвлөж байна. Ерөнхийлөгчийг саатуулсны дараа CIO түүнийг албан ёсоор баривчлах эсвэл суллахад 48 цагийн хугацаа бий.
Э.Хулан
Эх сурвалж: "Монцамэ" агентлаг
Сэтгэгдэл9
Мөрдөгчид баривчлах гээд ирвэл автоматын шуурган галаар угтаарай Юунсокоо !
Өмнөд Солонгосын воны ам доллартай харьцах ханш 2008 оны дэлхийн санхүүгийн хямралаас хойшхи хамгийн доод төвшиндөө хүрчээ. Ер нь өөрсдийн мөнгөн тэмдэгтээр биш, АНУ-ын ам доллараас хамааралтай "зохиомлоор хөгжсөн" улс орнууд дампуурахад ойрхон байх шиг.Долларын "охин" евро удахгүй унана. Япон ч мөн адил Муу ёрлоогүй ч Монгол улс мөн ам долларын хамааралтай улс. 2 хөрштэйгөө ам доллараар гүйлгээ хийсээр байвал Монголын эдийн засаг навс унах цаг ирж магадгүй.
зохиомолоор хөгжинө гэж бас юу байдгийн бол ... наад өмнөд солонгосууд чинь өөрсдийнхөө тархийг ажиллуулж, хөлсийг урсгаж, зогсолтгүй хөдөрмөрлөж байж л хөгжсөн улс шүү дээ
Нэг мөр рубльээр гүйлгээ хий гэчих. Япон солонгос зохиомлоор хөгжиж байгаа хойд со куба орос ормгоор хөгжиж бгаа гээч хаха БРИКС ална гээч хаха
Ажлаа хийдэг албан тушаалтнууд, эрхээ хамгаалж нэгдэж чаддаг ард түмэн сайхан юм өө.
Ардчилсан улсад хууль Өндөр албан тушаалтнууд ч гэсэн шудрага үйлчилдэгийн нэгэн жишээ , гэтэл манайд ямар вэ , УИХ-ын гишүүд ард түмнээсээ тусдаа Халдашгүй Дархан Эрх гэгчийг өөрсөддөө зориулж гарган эдэлдэг нь Үндсэн Хуулин дахь : Монгол улсын иргэд адил тэгш Эрх Үүрэгтэй гэсэн заалтыг зөрчиж буй явдал юм.
Дэмжээд гаргана. Буусных нь дараа муулна. Шалгах эрх түй ч байхгүй. Тэд л баяжна.
Хууль шүүхийн байгууллагууд нь хэнээс ч хараат бусаар ажилладаг байдал хөгжлийн нэг тулгуур нь гэж бодож байна. Хэн ч санаатай, санамсаргүй байдлаар буруу шийдвэр гаргасан бол хариуцлагаа хүлээдэг учраас дараа дараачийн хүмүүст сургамж болдог. Эрх мэдлийн төлөө албан тушаалаа ашигласан ерөнхийлөгчөө баривчлах шийдвэр гаргаад түүнийгээ хэрэгжүүлэхээр зүтгэж байгаа хууль шүүхийн байгууллагыг нь хараад атаархаж байна. Ийм улс орон хөгжихгүй яахав дээ. Манайхан бол авилгач эрх мэдэлтнүүдийнхээ суганы үс болж тэдний хүслийг гүйцэлдүүлж тэр далиманд нь өөрөө ч бас жижиг сажиг асуудал зохицуулж таван цаас олдог нь нууц биш. Ерөнхийлөгч бол хууль шүүхийн байгууллагыг атгаж байгаа субъект шүү! Тэгэхээр бид эрх барьж байгаа намаас бус, зөв хүнээ ерөнхийлөгчөөр сонгож чадвал намын авилгачидтай хариуцлага тооцох бага боловч боломж гарч ирнэ. Нэг намаас гарсан ерөнхийлөгч тэр намынхаа авилгачдыг хэрхэн хамгаалж байгааг бид олон жил харсан. Тэгэхээр ерөнхийлөгчөөр маш зөв хүнийг сонгох хэрэгтэй!
оронд нь Ордонд суух гэж яарагчид нь өайж ядан барьц алдаж алдаан дээр нь тоглож байна Уул нь энэ хүн чинь жинхэнэ сонгулиар гарч ирсэн хүн шдээ