ВАШИНГТОН, 2024 оны арванхоёрдугаар сарын 30 /BBC/. АНУ-ын Ерөнхийлөгч асан Жимми Картер 100 насандаа таалал төгссөн тухай түүний үүсгэн байгуулсан сангийн удирдлага мэдэгдлээ.

Тэрбээр ням гаргийн үдээс хойш Жоржиа муж улсын Плейнс хот дахь гэртээ хорвоогийн мөнх бусыг үзүүлсэн гэж ар гэрийнхэн нь мэдээлсэн байна. Хүү нь түүний талаар хэлэхдээ “зөвхөн миний төдийгүй энх тайван, хүний ​​эрх, өгөөмөр хайранд итгэдэг хүн бүрийн хувьд баатар байсан” хэмээн тодорхойлжээ.

АНУ-ын Ерөнхийлөгч Жо Байден хэлэхдээ "Ж.Картер бол зарчимч, үнэнч шударга, даруу төлөв зантай хүн” гэж тодорхойлсон бол шинээр сонгогдсон Ерөнхийлөгч Дональд Трамп америкчууд Ж.Картерт “талархаж явах өртэй” гэж мэдэгдсэн байна. Ерөнхийлөгч асан Билл Клинтон хэлэхдээ, Ж.Картер “бусдын төлөө хүчин зүтгэхийн тулд амьдарсан” гэсэн байна.

Ж.Картер 1977-1981 оны хооронд АНУ-ын 39 дэх Ерөнхийлөгчөөр ажилласан бөгөөд АНУ-ын түүхэнд хамгийн урт насалсан ерөнхийлөгч юм. Өнгөрсөн оноос эхлэн тэрбээр элэг, тархинд нь тархсан меланома өвчний улмаас гэртээ хөнгөвчлөх эмчилгээ хийлгэж байжээ.

Ж.Картер бүрэн эрхийн хугацаагаа дуусгасныхаа дараа хамгийн урт удаан амьдарсан АНУ-ын Ерөнхийлөгч болж түүхэнд тэмдэглэгдсэн юм. Түүний төрийн тэргүүнээр ажиллаж байсан үеийг Ойрх Дорнодод болсон түүхэн үйл явдлуудтай холбон дурсдаг. Тэрбээр Египет, Израилын хооронд 1979 онд найрамдлын түүхэн гэрээ байгуулахад гол үүрэг гүйцэтгэсэн 1978 оны Кэмп-Дэвидийн хэлэлцээрт зуучилсан юм.

Тэрбээр мөн 1979 оны Исламын хувьсгалын дараа 444 хоногийн турш барьцаалагдсан Техран дахь АНУ-ын Элчин сайдын яамны 52 ажилтныг суллахаар хэлэлцээ хийх үед Ерөнхийлөгчөөр ажиллаж байв. 

1980 онд АНУ-ын ерөнхийлөгчийн сонгуулийн кампанит ажил ид өрнөж байх үед барьцаалагдсан хүмүүсийг аврах ажиллагаа дөрөвдүгээр сард бүтэлгүйтэж, найман америк иргэн амиа алджээ. Энэ нь тэрбээр Рональд Рейганд ялагдах гол шалтгаан болсон гэж үздэг. Барьцаалагдсан хүмүүсийг 1981 онд Р.Рейган тангараг өргөснөөс хойш хэдхэн минутын дараа суллаж байв. Ерөнхийлөгчийн сонгуульд ялагдсаныхаа дараа Ж.Картер олон улсад энхийг сахиулах, ардчилал, нийгмийн эрүүл мэнд, хүний ​​эрхийг хамгаалахад чиглэсэн үйл ажиллагаа явуулдаг Картерын нэрэмжит төвийг 1982 онд байгуулжээ.

Э.Хулан

Эх сурвалж: "Монцамэ" агентлаг