sonin.mn
Сэтгэгдэл (63)

Зөвлөлт Украинд цэргийн дээд сургуульд суралцан төгсгөж зэвсэгт хүчиндээ зүтгэж явсан олон арван офицерын нэгийн хувьд дайн байлдаан, давшилт хориглолтын талаар энгийн иргэдийг бодвол гадарлана. Тэр мэдлэг туршлагаараа өнөөгийн Орос-Украины энэ дайныг харж, оперативын цагийн байдлыг үнэлдэг. Курскт Украины явуулж буй тусгай операц, цаашлаад ОХУ-ын төв, баруун, хойд бүсийн хотууд нь “фронт орчмын” болж хувирч байгаад хариулт хайж сайтуудаас орчуулж тайлбарлая.

 

Их гүрэн, хүчирхэг гүрэн, цэргийн гүрэн, ялагдашгүй гүрэн гэдэг домгийг нь Курск муж дахь өнөөгийн үйл явдал доош нь хийтэл харууллаа. Украины цэрэг тийшээ нэвтрээд лав гурван 7 хоног амжилттай байлдаж байна.


Украины цэрэг-аж үйлдвэр сөнөчихөөгүй, нэг байрандаа зогсоогүй, хөгжсөөр, бүр зарим зэвсэглэл дээр Оросоосоо давж хөгжсөнийг шөнө болгоны дрон, нисэгчгүй онгоцны энэ олон дайралт харуулж байна. Шөнө болгон хэдэн зуугаар нь нисгээд илгээгээд байж чадах боллоо. Хэвлэлийн хурал дээр Владимир Зеленский өөр нэг шинэ мэдээ хэлжээ. Украин нь анх удаа өөрсдийн бүтээсэн баллистик пуужингаа туршилтад оруулж, амжилттай туршсан гэснийг нь дагалдуулаад түүний тусгал нь 500 километр гэж хэвлэлүүд бичжээ. Ийнхүү Украин нь өөрсдийн зохион бүтээсэн алсын тусгалт баллистик пуужингаараа барууныхнаас асуухгүйгээр Оросын нутгийн гүнд цохилт өгч чадах тухай мэдээлэгдсэний дараа ОХУ-ын Гадаад хэргийн сайд Сергей Лавров мэдэгдэл хийж “Хэрэв тийм шийдвэр гаргавал бид цөмийн пуужингаар хариу цохилт өгөх талаар ярилцах болно” гэж сүрдүүлжээ. Ингэхэд Оросын сүрдүүлэг ч тоогоо алдаад дууссан, даян дэлхий ч дөжирч гүйцжээ.

 

Украины цохилтын дронууд Мурманск муж руу хүрч сүйтгэж байхыг дэлхий нийтээрээ харлаа. Ингэж байхад бүр цаашаа Оросын нутгийн гүн рүү нэвтрэх юм байна гэдгийг дэлхий дахин харж, мэдэрч, бас гайхаж байна.


Ийнхүү ДРОН цаашаанаа Омск, Кировск, өөр хотууд... Оросыг хар өвөл хүлээж байх өндөр магадлал харагдана. Хар гэдэг нь шөнө болгон гал түймэр, тог цахилгаангүй, цахилгаан станцууд нь байнгыг довтолгоонд, дээрээс нь нефть, гаазны үйлдвэр, сүлжээнүүд байнга дроны атак дор байхыг нь хэлээд байна. Энэ бол миний үг биш. Оросын өөрийнх нь суртал нэвтрүүлэгчид телевизүүдээр хашгиралдан ярьж, БХЯ, ЗХЖШ-аасаа баталгаа нэхээд байна.

 

Украины зэвсэгт хүчний ерөнхий командлагч Александр Сырский нь орос үндэстэн, Украинд төрж өсөөгүй, зөвлөлтийн армийн нэг ангид Зөвлөлт Украинд алба хааж байхад нь эх орон нь тарж хуваагдаад тэр өөрөө Украинд үлдээд албаа үргэлжлүүлсэн гэдгийг энд бас зориуд тэмдэглэе. Түүний эцэг эх, ахан дүүс одоо ч Оросын Владимир мужид аж төрж байна. Тэгэхлээр одоогийн энэ дайн орос, украин хоёр үндэстний хооронд дэгдээгүй гэдгийг Украиныг хараагчдад хандаж тэмдэглэхийг хүсч байна. Сырскийн мэдэгдлээс үзвэл, Украины арми нь Оросын Курск мужийн 1294 хавтгай дөрвөлжин км талбай бүхий 100 сууринг хяналтандаа авсан. Одоо ч Курск хотын чиглэлд урагшилсаар байна. Оросын арми хүн хүч, зэвсэг техникийн их хэмжээний хохирол хүлээсэн. Курск мужид Оросын олон тооны цэргийн албан хаагч (600 давсан) олзлогдсон гэжээ.


Украины хичнээн тооны цэрэг, энгийн иргэд, эх нялхас энэ дайны золиос болсныг энд нуршилтгүй. Тэр бол Оросын ялалт огтоос биш. ОХУ нь өөрийнхөө 500 гаруй мянган (хагас сая) орос залуусын амиар тоглосон энэ дайн Курск мужаа алдсанаар нэгэнт өөрсдийнх нь хяналтаас гарч төгсгөл рүүгээ ойртсон байж магадгүй юм.

 

Оросыг энхийн цагаан тагтаа гэж өргөмжлөөд, Украиныг хар нацистаар нь дууддаг, Украиныг сөнөөсэй гэж харааж таашаал авдаг троллуудад хандаж хэлье. Энэ дайн ба хохирол миний зүрх сэтгэлийг үнэхээр өвтгөж байгаа учраас нийтэлээ орууллаа.


Ний нуугүй хэлье. Оросын тархи угаалт тун явуургүй боллоо. Орос ялна гэсэн мэдээллийн фейк ваакумд төөрч яваа монгол троллууд минь Путин ялахыг хүлээсэн бүтэшгүй цөхрөлөөсөө яаралтай салах хэрэгтэй. Украиныг Орос ялж байна гэж өөрийгөө хуурахаа боль. Маш том эндүүрэл шүү. Орос террорист дайндаа ялахгүй, ялахгүй нь улам бүр нотлогдож байна. Украин, Зеленский, АНУ, НАТО-г мянгантаа харааж муулаад Орос ялдаг бол ялахаар байлаа. Одоо ямар байна? 


Орчуулж тайлбарласан Адьяaгийн Батсайхан (бэлтгэл хошууч)