sonin.mn
Сэтгэгдэл (86)

УИХ-ын гишүүн, Хууль Зүй, Дотоод Хэргийн Сайд О.Алтангэрэл өчигдөр орой 461 дүгээр хорих ангид цагдан хоригдож байхдаа нас барсан иргэн О-ын ар гэрийн төлөөлөл, өмгөөлөгчтэй уулзлаа. 

О.Алтангэрэл талийгаачийн ар гэрийнхэнд нь гүн эмгэнэл илэрхийлж, тэдний санал гомдлыг сонсож, хууль сахиулах, шүүхийн шийдвэр гүйцэтгэх байгууллагад дараах үүрэг чиглэлийг өглөө.

Үүнд: 

1. Цагдаагийн байгууллага цаашид мэдээлэл хийхдээ аливаа төрлийн хохирогч, тэр дундаа амь хохирогчийн хувийн, эмзэг мэдээллийг задруулахгүй байж, нэр төр, алдар хүндэд нь халдахгүй байхад анхаарч, мэдээлэл хийх журам боловсруулж хэрэгжүүлэн ажиллах, 

2. Шүүхийн шийдвэр гүйцэтгэх байгууллага амь хохирогчийн бие муу байхад  гавласан гэх асуудлыг нягтлан шалгаж, яаралтай эргэн танилцуулах үүрэг, чиглэл өгөв. 

3. Хууль сахиулах байгууллагын алба хаагчдын холбогдсон хэргийг хараат бусаар шалгах прокурорын дэргэдэх “Мөрдөн байцаах алба” байгуулах чиглэлээр Хууль зүй, дотоод хэргийн яам анхаарч ажиллана. 

Тус уулзалт нь нэг удаагийн гал унтрааж буй арга хэмжээ бус цаашид энэ хэрэг шийдвэрлэгдэх хүртэл ар гэрийнхэнтэй нь өмгөөлөгчөөр дамжуулан байнга холбоотой ажиллахаа сайд О.Алтангэрэл илэрхийлж, Хууль зүй, дотоод хэргийн яам болон харьяа байгууллагуудаас томилсон Ажлын хэсгийн шалгалтын дүнгээр буруутай нь тогтоогдсон этгээд, албан тушаалтнуудад хатуу хариуцлага тооцно гэдгээ мэдэгдсэн байна.


Хачирхалтай нь Цагдаагийн Ерөнхий Газрын Дарга, дотоодын цэргийн командлагч, бригадын генерал Т.Сүхболд, Шүүхийн Шийдвэр Гүйцэтгэх Ерөнхий Газрын Дарга, хурандаа Б.Нандинболор нар Хууль Зүй, Дотоод Хэргийн Сайд О.Алтангэрэлийн зарласан уулзалтанд очоогүй аж.


Уулзалтад Хууль зүй, дотоод хэргийн яамны Төрийн нарийн бичгийн дарга Н.Мягмар, Бодлогын хэрэгжилтийг зохицуулах газрын дарга Л.Нямгэрэл, бусад холбогдох газрын албан хаагчид болон Цагдаагийн ерөнхий газрын дэд дарга, цагдаагийн хурандаа Т.Ганзориг, Шүүхийн шийдвэр гүйцэтгэх ерөнхий газрын Тэргүүн дэд дарга бөгөөд Хорих ял эдлүүлэх албаны дарга, хурандаа А.Намсаманд, Шүүх шинжилгээний ерөнхий газрын Захиргаа удирдлагын газрын дарга, цагдаагийн хошууч Б.Амар нар оролцжээ.



Өөрөөр хэлбэл нийгэмд ихээхэн шуугиан дэгдээгээд буй, хамгийн гол нь Цагдаа, Шүүхийн Шийдвэр гүйцэтгэх байгууллагын албан хаагчид шууд холбоотой асуудал яригдаж байхад Цагдаагийн Ерөнхий Газрын Дарга, дотоодын цэргийн командлагч, бригадын генерал Т.Сүхболд, Шүүхийн Шийдвэр Гүйцэтгэх Ерөнхий Газрын Дарга, хурандаа Б.Нандинболор нар очоогүй нь ихээхэн анхаарал татна.


Хүнд өвчтэй хэвтэрт орчихоогүй л бол амралттай байсан ч оройн цагаар очоод салбарын сайдынхаа зарласан уулзалтад оролцох боломжтой.



Гэтэл Цагдаагийн Ерөнхий Газрын Дарга, дотоодын цэргийн командлагч, бригадын генерал Т.Сүхболд, Шүүхийн Шийдвэр Гүйцэтгэх Ерөнхий Газрын Дарга, хурандаа Б.Нандинболор нарт чухам ямар хүндэтгэх шалтгаан байсан болоод уг уулзалтад дэд дарга нараа явуулах болов?


С.Сарнай