sonin.mn
Сэтгэгдэл (3)

ХЕЛЬСИНКИ, 2024 оны долоодугаар сарын 2 /DW/. Финландын парламент АНУ-тай батлан хамгаалахын салбарт хамтран ажиллах тухай гэрээг /DCA/ даваа гарагт санал нэгтэй баталжээ.  Ингэснээр Америкийн тал Финландын цэргийн 15 байгууламжид нэвтрэх эрхтэй болж байна. Үүнээс гадна, Финландын нутаг дэвсгэрт цэрэг, зэвсэг техникээ байрлуулах, дамжин өнгөрүүлэх боломжтой болох юм.


Гэрээнд заасны дагуу АНУ-ын цэргүүд болон тэдний ашиглаж буй байгууламжууд, нутаг дэвсгэрүүдийн аюулгүй байдлыг хангах үүргийг Финландын тал хүлээх аж.


Уг гэрээнд тус хоёр улс өнгөрсөн оны 12 дугаар сарын 18-нд гарын үсэг зуржээ. Финландын парламентын гадаад хэрэг эрхэлсэн хорооны дарга Киммо Кильюнен энэхүү хэлэлцээрийг баталсныг "түүхэн мөч" хэмээн мэдэгдсэн байна. Тэрбээр мэдэгдэхдээ "эл гэрээний зорилго бол НАТО-д элсэхтэй адил Финланд болон Финландын ард түмний аюулгүй байдлыг бэхжүүлэх явдал юм" гэжээ.  АНУ үүнтэй ижил төстэй гэрээг Швед, Норвег, Дани зэрэг НАТО-гийн гишүүн 11 улстай байгуулсан байна. 




Д.Жаргал

Эх сурвалж: "Монцамэ" агентлаг