Ютагийн амбан захирагч баривчилгааны явцыг дэлгэлээ

АНУ-ын барууны үзэлтэй идэвхтэн Чарли Кирк энэ долоо хоногийн эхээр их сургуулийн арга хэмжээний үеэр тайзан дээр буудуулж амиа алдсан билээ. Үүнтэй холбогдуулан Юта мужаас гаралтай 22 настай Тайлер Робинсон нэртэй залууг цагдаа нар баривчилжээ.

33 цаг үргэлжилсэн эрлийн эцэст пүрэв гарагийн орой Робинсон эцгийнхээ ятгалгаар өөрийгөө илчилсэн байна.

Түүнийг саатуулсныг хамгийн түрүүнд ерөнхийлөгч Дональд Трамп зарлаж, сэжигтэнд цаазаар авах ял оноох ёстой гэж мэдэгдэв.

Хэрэг илрэх явц

Баасан гарагт болсон хэвлэлийн хурлын үеэр мөрдөн байцаагчид мэдээлэхдээ, сэжигтэн эцэгтээ хэрэгтээ хүлээж, “бууж өгөхөөс илүүтэй өөрийгөө егүүтгэхийг хүсэж байна” гэж ярьжээ. Үүний дараа эцэг нь гэр бүлийн найз, залуучуудын пасторт хандан тусламж хүссэн байна.

Эцэг болон пастор хоёул түүнд тайвшруулах үг хэлж, улмаар пастор АНУ-ын Маршалын албатай холбогдсоны дараа Робинсоныг орон нутгийн цагаар 22:00 цагийн үед баривчилжээ.

Амбан захирагч Спенсер Кокс хэлэхдээ, хяналтын камерын дүрс бичлэгт Робинсон буудлага болохоос дөрвөн цагийн өмнө Юта Валлей их сургуулийн хотхонд ирсэн нь тодорхой харагдаж байсан гэлээ. Баригдах үедээ ч тэр бичлэг дээр гарсан хувцастайгаа ижил хувцастай байжээ.

Мөрдөн байцаагчид мөн түүний гэр бүлийн хүнээс мэдүүлэг авахад, сүүлийн жилүүдэд Робинсон улс төрийн үзэл бодлоороо улам хурцдаж байсныг дурдсан байна. Тэрээр саяхны нэгэн уулзалтын үеэр “Кирк Ютад ирэх гэж байна, тэр үзэн ядалтаар дүүрэн, үзэн ядалт тарааж байна” гэж хэлж байжээ.

Илэрсэн нотлох баримтууд

Цагдаа нарын мэдээлснээр, сэжигтний өрөөний хамтрагч Discord аппликэйшнээр бичигдсэн зурвасуудыг үзүүлсэн байна. Тэнд буугаа “нууц газраас авах”, “алчуурт боогоод бутанд нуусан” тухай дурдсан байв.

FBI-гийн мэдээлснээр, кампусын ойролцоох модон дунд Маузер .30-06 загварын винтовыг үнэхээр алчуурт боосон байдалтайгаар илрүүлжээ. Зэвсэг дээр дуран суурилуулсан байсан бөгөөд хамт олдсон сумны гильз дээр “hey fascist! CATCH!” болон “Bella ciao” гэх үгсийг сийлсэн байв.

“Bella ciao” нь италиар “сайхан минь баяртай” гэсэн утгатай бөгөөд нацистын Герман цэргүүдийн эсрэг тэмцсэн Италийн эсэргүүцлийн дуу юм.

Цаашдын арга хэмжээ

Ютагийн амбан захирагч хэлэхдээ, одоогоор өөр этгээдийг саатуулах эсэх нь тодорхойгүй байна. Харин мужийн прокурорууд ирэх мягмар гарагт Робинсоны эсрэг албан ёсны яллах дүгнэлт гаргахаар төлөвлөжээ.

Түүнийг “төлөвлөсөн аллага”, “шударга ёсонд саад учруулах”, “галт зэвсэг хэрэглэх” зэрэг хэргээр буруутгаж байна.

Юта Валлей их сургуулийн оюутнуудын зүгээс сэжигтэн баривчлагдсанд сэтгэл амарсан тухайгаа BBC-д ярьсан байна. Гэвч буудлага болсон цагаас хойш сургуулийн хотхон хаалттай хэвээр байгаа аж.

Сэжигтний тухай

Тэрээр Юта мужийн Сент Жорж хотод, Зайон үндэсний цэцэрлэгт хүрээлэнгийн ойролцоо амьдардаг.

Дикси Техникийн коллежид цахилгааны дадлагын 3-р курсийн оюутан байсан.

Өмнө нь намын харьяалалгүй сонгогчоор бүртгүүлсэн ч сүүлийн ерөнхийлөгчийн сонгуулиудад санал өгөөгүй.

Эцэг нь тавилга, гал тогооны суурилуулалтын бизнес эрхэлдэг, эх нь нийгмийн ажилтан. Гэр бүл нь Мормон шашинтай бөгөөд сүмийн идэвхтэй гишүүд гэнэ.

М.Чой

Эх сурвалж: BBC