sonin.mn
Сэтгэгдэл (0)

Ардчилсан намын Үндэсний бодлогын хороо, Их хурал хуралдаж, Одонгийн Цогтгэрэл намын даргаар сонгогдлоо. Намын даргаа тодруулахын өмнө АН-ын даргад нэр дэвшигчдийн хооронд шууд халз мэтгэлцээн зохион байгуулсан нь Монголын улс төрийн практикт шинэ өнгө, соёл авчирсан чухал үйл явдал байв. Намын даргад өрсөлдөж буй хүмүүс үзэл баримтлал, байр сууриа намынхаа гишүүд, дэмжигчид ба ард иргэдийнхээ өмнө нээлттэй илэрхийлж, мэтгэлцээний бас нэгэн шинэ соёлыг төлөвшүүлэх эхлэлийг тавилаа.


Харин эрх баригч МАН-ын хувьд нөхцөл байдал эсрэгээр өрнөж байна.


МАН-ын дарга, Ерөнхий сайд асан Лувсаннамсрайн Оюун-Эрдэнийг олон нийт 1990 оноос хойших түүхэндээ хамгийн хаалттай, нээлттэй бус Ерөнхий Сайдуудын нэг хэмээн дүгнэдэг. Тэрбээр Ерөнхий сайдын суудалд байх хугацаандаа ард иргэдтэй нээлттэй уулзалт хийхээс зайлсхийж, бие даасан сэтгүүлчдийн асуултаас бултаж ирсэн нь улс төрийн соёлын хувьд ухралт байлаа.


Түүний мэдээлэл түгээх хэлбэр нь зөвхөн төрсөн ахынхаа студид бэлтгэж, сайтар монтажилсан сурталчилгааны өнгө аястай контентод хязгаарлагдаж байсныг олон нийт сайн мэддэг болсон. Харин ард иргэдтэй нүүр тулж уулзах, сэтгүүлчдийн асуултад хариулахаас тэрээр үргэлж зайлсхийдэг байв.


Бүрэн эрхийнхээ хугацаанд тэр нэг ч удаа сэтгүүлчдэд албан ёсны ярилцлага өгөөгүй.


Хамгийн сүүлд гэхэд л УИХ-аар өөрт нь итгэл үзүүлэх асуудлыг хэлэлцсэний дараа хэвлэлд мэдээлэл өгнө хэмээн амласан ч сурсан зангаараа аанай л зугтан алга болжээ.


Энэ бүхэн улс төрийн хоёр том намын удирдлагын хэв маяг, ардчиллын үнэт зүйлсийн талаарх ойлголт хэр зөрүүтэйг тод харуулж байна. Ардчилсан Нам мэтгэлцээнээр удирдлагаа тодруулж, шинэ соёл түгээж эхэлж байхад эрх баригч МАН-ын дарга сэтгүүлчдээс зугтаж, хаалттай хэвээр үлдсэн нь Монголын улс төрийн хоёр өөр дүр төрхийг тод томруун харуулж буй жишээ юм.


Б.Намуун